Rumeli Sadareti Mahkemesi 80 Numaralı Sicil (H. 1057-1059/M. 1647-1649) cilt: 15, sayfa: 81 Hüküm no: 54 Orijinal metin no: [14a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Efendi b. Mehmed’in mülk menzilini 57. Ağa Bölüğü Odası Vakfı’na vefâen sattığı Saruhan Sancağı’nda kasaba-i Gördos ahâlîsinden Mehmed Efendi b. Mehmed meclis-i şer‘-i hatîr-i lâzımü’t-tevkīrde, Elli Yedinci Ağa Bölüğü Odası’nın mühimmâtına mevkūf nükūdun bi’l-fi‘l mütevellîsi olan işbu râfi‘ül-kitâb Mehmed Beşe b. İsmail nâm râcil mahzarında bi’t-tav‘i’s-sâf ikrâr ve i‘tirâf edip silk-i mülk ve yedimde münselik ve münharıt olup kasaba-i mezbûrede vâki‘ bir tarafı Eski Câmi‘ haremine ve etrâf-ı selâsesi tarîk-i âmma müntehî cemî‘ mülk hamamımı [cemî‘] tevâbi‘ [ve] levâhıkıyla mezbûr Mehmed Beşe’ye safka-i vâhide ile üç yüz riyâlî kuruşa târih-i kitâbdan altı ay tamâmına değin müeccel ve mev‘ûd bey‘ bi’l-vefâ ile bey‘ edip ol dahi vech-i muharrer üzre iştirâ ve kabûl edip semen-i mezkûru kabzımdan sonra mütevellî-i mezbûr mâl-ı vakf-ı mezbûreden bir siyah iskarlat çukalı cil-kafa kürk ile yine târih-i mezkûrdan altı ay tamâmına değin otuz riyâlî kuruşa bana bâtten bey‘ ve teslîm edip ben dahi iştirâ ve tesellüm edip semen-i mezkûr otuz riyâlî kuruş zimmetimde vâcibü’l-edâ ve lâzımü’l-kazâ deynim olup zikr olunan hamam [ve] dört bâkī dükkânları mahallinde kabza ve teslîme mütevellî-i mezbûru taslît eyledim dediğinden sonra bey‘-i mezkûr-ı hakīkīde rehin vesîka olmakla, yine merkūm Mehmed Efendi ecel-i mezkûr hulûlüne ve semeneyn-i mezkûreyn üç yüz riyâlî kuruşu ve otuz riyâlî kuruşu edâ ve îfâya adem-i kudreti olıcak, mütevellî-i mezbûr talebi ile mahmiye-i İstanbul’da Bayezid mahallesinde sâkin Mehmed Ağa b. Mustafa tarafından azl ve in‘izâlden masûn vekâlet-i devriye ile vekîl eyledikde, mezbûr Mehmed Ağa dahi vekâlet-i mezbûreyi ve hizmet-i lâzımesin edâya müte‘ahhid olıcak, mâ hüve’l-vâki‘ bi’t-taleb ketb olundu. Hurrire fi’l-yevmi’t-tâsi‘ min şehri Rebî‘ilevvel li sene tis‘a ve hamsîn ve elf. Şuhûdü’l-hâl: Yakub Beşe b. Ali seroda, Ali Efendi b. Mehmed, el-Hâc Mustafa b. ( ) el-Hayyât, Ramazan Beşe b. Mahmud, Bâkī Beşe b. Mustafa.