Rumeli Sadareti Mahkemesi 80 Numaralı Sicil (H. 1057-1059/M. 1647-1649) cilt: 15, sayfa: 82 Hüküm no: 55 Orijinal metin no: [14a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Osman Sipâhi b. İbrahim’in alacak hususunda Canik eski sancak beyi Dilaver Paşa ile sulh olduğu Vilâyet-i Anadolu’da vâki‘ Canik Sancağı’nda Serkiz kazâsına tâbi‘ Kuluncak nâm karyeden Osman Sipâhi b. İbrahim nâm kimesne meclis-i şer‘-i hatîrde, sâbıkan livâ-i mezbûre mutasarrıf olan emîrü’l-ümerâ Dilaver Paşa tarafından sulh-ı âti’l-beyânı tasdîka vekîl olup vekâleti bi mâ hüve nehcü’s-sübût şer‘an sâbite olan Hasan Ağa b. Veli mahzarında tav‘an ikrâr ve i‘tirâf [edip] müvekkil-i müşârun-ileyh Dilaver Paşa livâ-i mezbûra mutasarrıf olduğu hâlde, sen Mehmed Bey nâmında bir sipâhi ile arbede eyledin deyû benden Ayvacık kazâsında Yenice nâm karyede altmış dişi koyunumu ve otuz yedi re’s kuzumu ve on beş buçuk riyâlî kuruşumu ve bir kara acem kılıcımı ve dört yaşında iki kıç ayakları sekili bir re’s doru atımı nâ-hak ahz u kabz edip hâlâ zafer bulduğumda hakkım olan sâlifü’z-zikr koyun ve kuzu ve kara kılıç ve kuruşu ve müvekkil-i müşârun-ileyhden taleb ve da‘vâ eylediğimde, müvekkil-i müşârun-ileyh dahi ben livâ-i mezbûre mutasarrıf olduğum hâlde resm-i ağnâmı mîr-livâya âide olmağla etbâ‘ımdan Mustafa Ağa nâm kimesneyi resm-i ağnâm cem‘ine tarafımdan havâle edip ba‘de’l-cem‘ senin yedinde koyup ahza beni taslît eylemekle müdde‘ân olan altmış beş re’s koyununu ol vechile ahz eyledim deyû kabzını ve vech-i meşrûh üzre kuzu ve at ve kuruşu [ve] kılıç ahzını inkâr edip ben dahi ihzâr-ı beyyine sadedinde iken beynimizde münâza‘ât-ı kesîre vâkı‘a olmuşdu. El-hâletü hâzihî beynimizde muslihûn tavassut edip zikr olunan koyun ve kuzu ve at ve kuruş ve kılıç da‘vâlarından beni müvekkil-i müşârun-ileyh ile iki bin fıddî râyic fi’l-vakt akçe üzerine inşâ-i akd-i sulh eylediklerinde, ben dahi sulh-ı mezbûru kabûl ve bedel-i sulh olan meblağ-ı mezbûr iki bin akçeyi meclis-i sulhda müvekkil-i müşârun-ileyh yedinden tamâmen ahz ve istîfâ eyleyip vech-i meşrûh üzre koyun ve kuzu ve kuruş ve kılıç da‘vâlarından berî olup müvekkil-i müşârun-ileyh Dilaver Paşa’nın zimmetin ibrâ-i âmm-ı kātı‘ü’n-nizâ‘la ibrâ ve iskāt eyledim. Min ba‘d zikr olunan koyun ve kuzu ve at ve kılıç ve kuruşa müte‘allika müvekkil-i müşârun-ileyh üzerine bi vechin mine’l-vücûh ve sebebin mine’l-esbâb da‘vâ ve nizâ‘ım ve alâka ve hakkım kalmadı dedikde, vekîl-i mezbûr Hasan Ağa bi’l-muvâcehe tasdîk ve bi’l-müşâfehe tahkīk edicek, mâ hüve’l-vâki‘ bi’t-taleb ketb olundu. Fi’l-yevmi’r-râbi‘ min şehri Rebî‘ilevvel li sene tis‘a ve hamsîn ve elf. Şuhûdü’l-hâl: Yahya Bey [b.] Zekeriya, İsa Bey [b.] Ahmed, Ahmed Çelebi b. Abdurrahman.