Rumeli Sadareti Mahkemesi 80 Numaralı Sicil (H. 1057-1059/M. 1647-1649) cilt: 15, sayfa: 83 Hüküm no: 56 Orijinal metin no: [14b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Abdi Beşe’nin alacaklı olduğu Mehmed Bey’le sulh yoluyla anlaştığı Dergâh-ı âlî yeniçerilerinden yetmiş dokuzuncu cemâ‘atinden olup hâlâ Beytülmâl-ı râcilîn emîni olan İlyas etbâ‘ından Abdi Beşe b. ( ) tarafından sulh-ı âti’l-beyânı ikrâra vekîl olup vekâleti Ahmed Subaşı [b.] Süleyman ve Beşir b. Rüstem şehâdetleri ile şer‘an sâbite olan Mustafa Beşe b. Mehmed meclis-i şer‘-i hatîrde, işbu râfi‘ül-kitâb [Mehmed] Bey b. ( ) mahzarında bi’l-vekâle ikrâr ve i‘tirâf edip müvekkil-i mezkûrun li ebeveyn ammisi olup bundan akdem vefât eden Bâli Beşe b. ( ) hâl-i hayât ve nefâz-ı tasarrufâtında merkūm Mehmed Bey’e gāib ani’l-meclis Zülfikār Ağa’ya îsâl için elli kıt‘a riyâlî kuruş def‘ ve teslîm edip ol dahi ba‘de’t-tesellüm meblağ-ı mezbûru merkūm Zülfikār Ağa’ya îsâl etmeyip kendi mesârifine sarfla istihlâk edip hâlâ mezbûr Bâli Beşe vefât edip verâseti müvekkilim mezbûra münhasıra olmakla, müvekkilim mezbûr dahi meblağ-ı mezbûr bi hasebi’l-irsi’ş-şer‘î bana isâbet ve intikāl eyledi deyû mezbûr Mehmed Bey’den taleb ve da‘vâ eyledikde, beynlerinde münâza‘ât-ı kesîre vâkı‘a olmuşdur. El-hâletü hâzihî beynlerine muslihûn tavassut edip meblağ-ı mezbûr da‘vâsından müvekkil-i mezbûru merkūm Mehmed Bey ile yirmi kıt‘a riyâlî kuruş üzerine sulh eylediklerinde, müvekkilem mezbûr dahi sulh-ı mezbûru kabûl ve bedel-i sulh olan meblağ-ı mezbûr yirmi kıt‘a riyâlî kuruşu meclis-i sulhda merkūm Mehmed Bey yedinden tamâmen ahz u kabz edip meblağ-ı bâkī otuz kuruş da‘vâsından mezbûr Mehmed Bey’in zimmetini ibrâ-i âmm-ı kātı‘ü’n-nizâ‘la ibrâ ve iskāt-ı tâmm-ı râfi‘ü’l-hisâm ile iskāt eyledi dedikde, vekîl-i mezbûrun minvâl-i meşrûh üzre cârî ve sâdır olan ikrârını el-mukarru [lehü’l]-merkūm vicâhen tasdîk ve şifâhen tahkīk edicek, mâ hüve’l-vâki‘ bi’t-taleb ketb olundu. Hurrire fi’l-yevmi’l-hâmis min şehri Rebî‘ilevvel li sene tis‘a ve hamsîn ve elf. Şuhûdü’l-hâl: Fahrü’l-a‘yân İlyas Ağa b. Sinan, Hüseyin Subaşı b. ( ), Ahmed Beşe b. ( ) seroda 25, Yahya b. Zekeriya.