Rumeli Sadareti Mahkemesi 80 Numaralı Sicil (H. 1057-1059/M. 1647-1649) cilt: 15, sayfa: 83 Hüküm no: 57 Orijinal metin no: [14b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hasan b. Cihan ve Nebi b. Cafer’in alacaklı oldukları Malatya sancağı eski mutasarrıfı olan Mehmed Paşa ile sulhu Vilâyet-i Anadolu’da Malatya kazâsına tâbi‘ Cubaz nâhiyesinde Bahri nâm karyeden Hasan b. Cihan ve Nebi b. Cafer nâm kimesneler meclis-i şer‘-i hatîrde, sâbıkan Malatya Sancağı’nda ber vech-i arpalık mutasarrıf olan düstûr-ı mükerrem müşîr-i müfahham nâzımu nizâmü’l-âlem mütemmimü mehâmmi’l-ümem Mehmed Paşa b. el-merhûm Defterdâr Mustafa Paşa tarafından sulh-ı âti’l-beyâna vekîl olup bi mâ hüve nehcü’s-[sübût] şer‘an vekâleti sâbite olan fahrü’l-emâsil Ali Ağa b. Lütfullah mahzarında her biri bi’t-tav‘i’s-sâf ikrâr ve i‘tirâf edip müvekkil-i mûmâ-ileyh bundan akdem Malatya Sancağı’na mutasarrıf iken karyenizde kan olmuşdur deyû nâ-hak yedimizden iki yüz kırk riyâlî kuruşumuzu [ve] kan akçesi deyû elli riyâlî kuruşumuzu ve devir akçesi deyû elli riyâlî kuruşumuzu nâ-hak ahz u kabz eylemişdi. Hâlâ mûmâ-ileyh Mehmed Paşa’ya zafer bulmağla husûs-ı mezbûru müvekkil-i mûmâ-ileyhden taleb ve da‘vâ eylediğimizde ol dahi inkâr edip bizim dahi beyyinemiz olmamağla müvekkil-i mûmâ-ileyhden yemîn sadedinde iken beynimize muslihûn tavassut edip bizi sulha vekîli olan işbu Ali Ağa ile kırk kıt‘a riyâlî kuruş üzerine an-inkâr sulh eylediklerinde, biz dahi sulh-ı mezbûru kabûl ve bedel-i sulh olan kırk kıt‘a riyâlî kuruşu meclis-i sulhda vekîl-i mezbûr Ali Ağa yedinden ahz u kabz edip da‘vâ-yı mezbûremizden berî olup husûs-ı mezbûra müte‘allika âmme-i da‘vâdan müvekkil-i mûmâ-ileyhin zimmetini ibrâ-i âmm-ı kātı‘ü’n-nizâ‘la ibrâ ve iskāt eyledik. Min ba‘d husûs-ı mezbûra müte‘allika müvekkil-i mûmâ-ileyh üzerine bi vechin mine’l-vücûh ve sebebin mine’l-esbâb da‘vâ ve nizâ‘ ve hakkımız kalmadı dediklerinde, mukırrân-ı mezbûrânı ikrâr-ı meşrûhlarında vekîl-i mezbûr vicâhen tasdîk ve şifâhen tahkīk edicek, mâ hüve’l-vâki‘ bi’t-taleb ketb olundu. Hurrire fi’l-yevmi’r-râbi‘ min şehri Rebî‘ilevvel li sene tis‘a ve hamsîn ve elf. Şuhûdü’l-hâl: Mustafa Ağa b. Abdülkerim es-sâkin Molla Hüsrev, Ali Bey b. Ahmed, el-Hâc Hüseyin b. Mehmed, el-Hâc Hasan b. Ömer, Hüseyin Ağa b. Derviş, Mehmed Çavuş b. Osman, Mehmed Çavuş b. Resûl, Musa Çelebi b. Mahmud, Ali Bey b. Mehmed, Halil b. Mehmed, Mehmed Efendi b. ( ), Zülfü b. Mansur, Üveys b. Davud, Derviş b. Salâh, Ahmed Kethüdâ b. Ali.