Rumeli Sadareti Mahkemesi 80 Numaralı Sicil (H. 1057-1059/M. 1647-1649) cilt: 15, sayfa: 84 Hüküm no: 58 Orijinal metin no: [15a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ahmed Kethüdâ b. Ali ve İsmail b. İsa’nın alacaklı oldukları eski Malatya Mutasarrıfı Mehmed Paşa sulhu Vilâyet-i Anadolu’da Malatya kazâsına tâbi‘ Cubaz nâhiyesinde Nerdübânlı nâm karyeden Ahmed Kethüdâ b. Ali ve İsmail b. İsa nâm kimesneler meclis-i şer‘-i hatîr-i lâzımü’t-tevkīrde, sâbıkan Malatya Sancağı’na ber vech-i arpalık mutasarrıf olan düstûr-ı mükerrem müşîr-i müfahham nâzımu nizâmi’l-âlem mütemmimü mehâmmi’l-ümem Mehmed Paşa b. el-merhûm Defterdâr Mustafa Paşa tarafından sulh-ı âti’l-beyânı vekîl olup bi mâ hüve nehcü’s-sübût şer‘an vekâleti sâbite olan fahrü’l-emâsil Ali Ağa b. Lütfullah mahzarında her biri bi’t-tav‘i’s-sâf ikrâr ve i‘tirâf edip müvekkil-i mûmâ-ileyh bundan akdem Malatya Sancağı’na mutasarrıf iken karyenizde kan eylemişsiniz deyû ahz u habs edip yedimizden iki yüz kırk riyâlî kuruşumuzu ve at akçesi deyû elli kıt‘a riyâlî kuruşumuzu ve devir akçesi deyû elli riyâlî kuruşumuzu nâ-hak ahz u kabz eylemişdi. Hâlâ mûmâ-ileyh Mehmed Paşa’ya zafer bulmağla husûs-ı mezbûru taleb ve da‘vâ eylediğimizde, ol dahi bi’l-külliye inkâr edip bizim dahi beyyinemiz olmamağla, müvekkil-i müşârun-ileyhe yemîn sadedinde iken beynimize muslihûn tavassut edip da‘vâ-yı mezbûremizden bizi sulha vekîli olan işbu Ali Ağa ile kırk kıt‘a riyâlî kuruş üzerine an-inkâr sulh eylediklerinde, biz dahi sulh-ı mezbûru kabûl ve bedel-i sulh olan meblağ-ı mezbûr kırk kıt‘a riyâlî kuruşu meclis-i sulhda vekîl-i mezbûr Ali Ağa yedinden tamâmen ahz u kabz edip da‘vâ-yı mezbûremizden berî olup husûs-ı mezbûra müte‘allika âmme-i da‘vâdan müvekkil-i mûmâ-ileyhin zimmetini ibrâ-i âmm-ı kātı‘ü’n-nizâ‘la ibrâ ve iskāt eyledik. Min ba‘d husûs-ı merkūma müte‘allik müvekkil-i müşârun-ileyh üzerine bi vechin mine’l-vücûh ve sebebin mine’l-esbâb da‘vâ ve nizâ‘ ve hakkımız kalmadı dediklerinde, mukırrân-ı mezbûrânı ikrâr-ı meşrûhlarında vekîl-i mezbûr vicâhen tasdîk ve şifâhen tahkīk edicek, mâ vaka‘a bi’t-taleb ketb olundu. Fi’l-yevmi’r-râbi‘ min şehri Rebî‘ilâhir li sene 1059. Şuhûdü’l-hâl: es-Sâbıkūn.