Rumeli Sadareti Mahkemesi 80 Numaralı Sicil (H. 1057-1059/M. 1647-1649) cilt: 15, sayfa: 85 Hüküm no: 59 Orijinal metin no: [15a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Zülfü b. Musli’nın alacaklı oldukları eski Malatya Mutasarrıfı Mehmed Paşa ile sulhu Vilâyet-i Anadolu’da Malatya kazâsına tâbi‘ Cubaz nâhiyesinde Fırıncı nâm karyeden Zülfü b. Musli nâm kimesne meclis-i şer‘-i hatîr-i lâzımü’t-tevkīrde, sâbıkan Malatya Sancağı’na ber vech-i arpalık mutasarrıf olan düstûr-ı mükerrem müşîr-i müfahham nâzımu nizâmi’l-âlem mütemmimü mehâmmi’l-ümem Mehmed Paşa b. el-merhûm Defterdâr Mustafa Paşa tarafından sulh-ı âti’l-beyâna vekîl olup bi mâ hüve nehcü’s-sübût şer‘an vekâleti sâbite olan fahrü’l-emâsil Ali Ağa b. Lütfullah mahzarında her biri bi’t-tav‘i’s-sâf ikrâr ve i‘tirâf edip müvekkil-i müşârun-ileyh bundan akdem Malatya Sancağı’na mutasarrıf iken karyenizde kan olmuş deyû beni ahz u habs edip yedimden iki yüz riyâlî kuruş ve at ve devir akçesi deyû otuz riyâlî kuruş nâ-hak ahz u kabz eylemişdi. Hâlâ mûmâ-ileyh Mehmed Paşa’ya zafer bulmağla husûs-ı mezbûr müvekkil-i mûmâ-ileyhden taleb ve da‘vâ eylediğimde, ol dahi bi’l-külliye inkâr edip benim dahi beyyinem olmamağla müvekkil-i mûmâ-ileyhe yemîn sadedinde iken beynimize muslihûn tavassut edip da‘vâ-yı mezbûremden beni sulha vekîli olan işbu Ali Ağa ile kırk kıt‘a riyâlî kuruş üzerine an-inkâr sulh eylediklerinde, ben dahi sulh-ı mezbûru kabûl ve bedel-i sulh olan meblağ-ı mezbûr kırk kıt‘a riyâlî kuruşu meclis-i sulhda vekîl-i mezbûr Ali Ağa yedinden tamâmen ahz u kabz edip da‘vâ-yı mezbûrumdan berî olup husûs-ı merkūma müte‘allik âmme-i da‘vâdan müvekkil-i mûmâ-ileyhin zimmetini ibrâ-i âm ile ibrâ eyledim dedikde, mukırr-ı mezbûru ikrâr-ı meşrûhunda vekîl-i mezbûr vicâhen tasdîk ve şifâhen tahkīk edicek, mâ hüve’l-vâki‘ bi’t-taleb ketb olundu. Hurrire fi’l-yevmi’r-râbi‘ [min] şehri Rebî‘ilâhir li sene 1059. Şuhûdü’l-hâl: es-Sâbıkūn.