Rumeli Sadareti Mahkemesi 80 Numaralı Sicil (H. 1057-1059/M. 1647-1649) cilt: 15, sayfa: 86 Hüküm no: 60 Orijinal metin no: [15b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Üveys b. Davud ve Derviş b. Salâh’ın alacaklı oldukları eski Malatya Mutasarrıfı Mehmed Paşa ile sulhu Vilâyet-i Anadolu’da Malatya Sancağı’nda Şora ma‘a Bucak kazâsına tâbi‘ Mezaristan nâm karyeden Üveys b. Davud ve Derviş b. Salâh nâm kimesneler meclis-i şer‘-i hatîrde, sâbıkan sancak-ı mezbûra ber vech-i arpalık mutasarrıf olan düstûr-ı mükerrem müşîr-i müfahham nâzımu nizâmi’l-âlem mütemmimü mehâmmi’l-ümem Mehmed Paşa b. el-merhûm Defterdâr Mustafa Paşa tarafından sulh-ı âti’l-beyâna vekîl olup bi mâ hüve nehcü’s-sübût şer‘an vekâleti sâbite olan fahrü’l-emâsil Ali Ağa b. Lütfullah mahzarında her biri bi’t-tav‘i’s-sâf ikrâr ve i‘tirâf edip müvekkil-i müşârun-ileyh bundan [akdem] mârrü’z-zikr Malatya Sancağı’na mutasarrıf iken karyenizde kan olmuş deyû dört yüz riyâlî kuruşumuzu ve at bahâsı ve zahîre-bahâ deyû doksan riyâlî kuruşumuzu nâ-hak ahz u kabz eylemişdi. Hâlâ mûmâ-ileyh Mehmed Paşa’[ya] zafer bulmağla, husûs-ı merkūmu müvekkil-i mûmâ-ileyhden taleb ve da‘vâ eylediğimizde ol dahi bi’l-külliye inkâr edip bizi sulha vekîli olan müşârun-ileyh Ali Ağa ile kırk kıt‘a riyâlî kuruş üzerine meclis-i sulhda müşârun-ileyh bir mutallâ tülbent üzerine [sulh edip] yedinden ahz u kabz edip da‘vâ-yı mezbûremizden berî olup husûs-ı mezbûra müte‘allik âmme-i da‘vâdan müvekkil-i mûmâ-ileyhin zimmetini ibrâ-i âmm-ı kātı‘ü’n-nizâ‘la ibrâ ve iskāt eyledik. Min ba‘d husûs-ı merkūma müte‘allik müvekkil-i mûmâ-ileyh üzerine bi vechin mine’l-vücûh ve sebebin mine’l-esbâb da‘vâ ve nizâ‘ımız ve hakkımız kalmadı dediklerinde, mukırrân-ı mezbûrânı ikrâr-ı meşrûhlarında vekîl-i müşârun-ileyh vicâhen tasdîk ve şifâhen tahkīk edicek, mâ hüve’l-vâki‘ bi’t-taleb ketb olundu. Hurrire fi’l-yevmi’r-râbi‘ min şehri Rebî‘ilâhir li sene 1059. Şuhûdü’l-hâl: es-Sâbıkūn.