Rumeli Sadareti Mahkemesi 80 Numaralı Sicil (H. 1057-1059/M. 1647-1649) cilt: 15, sayfa: 86 Hüküm no: 61 Orijinal metin no: [15b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Pîr Ahmed b. Mercan’ın alacaklı olduğu eski Malatya Mutasarrıfı Mehmed Paşa ile sulhu Vilâyet-i Anadolu’da Malatya kazâsına tâbi‘ Cubaz nâhiyesinde Karaköy ahâlîsinden Pîr Ahmed b. Mercan meclis-i şer‘-i hatîr-i lâzımü’t-tevkīrde, sâbıkan Malatya Sancağı’na ber vech-i arpalık mutasarrıf olan düstûr-ı mükerrem müşîr-i müfahham nâzımu nizâmi’l-âlem mütemmimü mehâmmi’l-ümem Mehmed Paşa b. el-merhûm Defterdâr Mustafa Paşa tarafından sulh-ı âti’l-beyâna vekîl olup bi mâ hüve nehcü’s-sübût şer‘an vekâleti sâbite olan fahrü’l-emâsil Ali Ağa b. Lütfullah mahzarında bi’t-tav‘i’s-sâf ikrâr ve i‘tirâf edip müvekkil-i mûmâ-ileyh bundan akdem Malatya Sancağı’na mutasarrıf iken karyenizde kan olmuş deyû iki yüz kuruşumu ve at akçesi deyû elli riyâlî kuruşumu ve devir akçesi deyû elli riyâlî kuruşumu nâ-hak ahz u kabz eylemişdi. Hâlâ mûmâ-ileyh Mehmed Paşa’ya zafer bulmağla, husûs-ı mezbûru müvekkil-i [mûmâ]-ileyhden taleb ve da‘vâ eylediğimde ol dahi inkâr edip benim dahi beyyinem olmamağla, müvekkil-i müşârun-ileyhe yemîn sadedinde iken beynimize muslihûn tavassut edip da‘vâ-yı meşrûhamdan beni sulha vekîli olan işbu Ali Ağa ile kırk kıt‘a riyâlî kuruş üzerine an-inkâr sulh eylediklerinde, ben dahi sulh-ı mezbûru kabûl ve bedel-i sulh olan meblağ-ı mezbûr kırk kıt‘a riyâlî kuruşu meclis-i sulhda vekîl-i mezbûr Ali Ağa yedinden tamâmen ahz u kabz edip da‘vâ-yı mezbûremden berî olup husûs-ı mezbûra müte‘allika âmme-i da‘vâdan müvekkil-i mûmâ-ileyhin zimmetini ibrâ-i âmm-ı kātı‘ü’n-nizâ‘la ibrâ ve iskāt eyledim min ba‘d husûs-ı merkūma müte‘allik müvekkil-i müşârun-ileyh üzerine bi vechin mine’l-vücûh da‘vâ ve nizâ‘ ve hakkım kalmadı dedikde, mukırr-ı mezbûru ikrâr-ı meşrûhunda vekîl-i mezbûr vicâhen tasdîk ve şifâhen tahkīk edicek, mâ hüve’l-vâki‘ bi’t-taleb ketb olundu. Hurrire fi’l-yevmi’r-râbi‘ min şehri Rebî‘ilâhir li sene tis‘a ve hamsîn ve elf. Şuhûdü’l-hâl: es-Sâbıkūn.