Rumeli Sadareti Mahkemesi 80 Numaralı Sicil (H. 1057-1059/M. 1647-1649) cilt: 15, sayfa: 87 Hüküm no: 62 Orijinal metin no: [15b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kürkçü Yorgi v. Şemo’nun alacaklı olduğu Mustafa Bey b. Şaban’ın zimmetini ibra ettiği Kürkçü tâifesinden olup Mahmud Paşa Hanı’nda sâkin Yorgi v. Şemo nâm zimmî meclis-i şer‘-i hatîr-i lâzımü’t-tevkīrde, mahmiye-i İstanbul’da Gedikpaşa kurbunda sâkin olan işbu râfi‘ül-kitâb mefharü’l-akrân Mustafa Bey b. Şaban mahzarında tav‘an ikrâr ve i‘tirâf edip bundan akdem mezbûr Mustafa Bey zimmetinde bir semmur kürkün semeninden bin dört yüz kıt‘a riyâlî kuruş hakkım vardır [deyû] da‘vâ eylediğimde, ol dahi benim sana on dokuz riyâlî kuruş ancak deynim vardır deyû kürk semenini inkâr edicek, meblağ-ı mezkûr on dokuz riyâlî kuruşu bana teslîm edip ben dahi ahz u kabz eylediğimden sonra da‘vâ-yı meşrûhamdan mezbûr Mustafa Bey’in zimmetini ibrâ ve iskāt eyledim. Min ba‘d mezbûr Mustafa Bey üzerine bi vechin mine’l-vücûh ve sebebin mine’l-esbâb da‘vâ ve hakkım yokdur dedikde, mukırr-ı merkūmun vech-i meşrûh üzre cârî ve sâdır olan ikrârını el-mukarru lehü’l-mezbûr vicâhen tasdîk ve şifâhen tahkīk edicek, mâ hüve’l-vâki‘ bi’t-taleb ketb olundu. Hurrire fi’l-yevmi’s-sâlis aşer min şehri Rebî‘ilâhir li sene tis‘a ve hamsîn ve elf. Şuhûdü’l-hâl: Ali Ağa b. Nasuh, Şaban Çavuş b. Veli, Ali Çavuş b. Cafer, Mustafa Çavuş b. Abdullah, Mehmed Çavuş b. Mustafa, İbrahim Çavuş b. Abdullah, Yahya Bey b. Zekeriya, İsa b. Ahmed, Ahmed Çelebi b. Abdurrahman.