Rumeli Sadareti Mahkemesi 80 Numaralı Sicil (H. 1057-1059/M. 1647-1649) cilt: 15, sayfa: 88 Hüküm no: 63 Orijinal metin no: [16a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ahmed b. Musli’nın Ali Bey b. Ali’den alacağını tahsil ettiği Mahmiye-i İstanbul’da Cezerî Kasım Paşa mahallesinde sâkin Ahmed b. Musli meclis-i şer‘de, işbu râfi‘ül-kitâb Ali Bey b. Ali mahzarında tav‘an ikrâr edip merkūm Ali Bey’den bundan akdem açık kaşlı gök elâ gözlü ebyazü’l-levn Rûsiyyetü’l-asl Kalender nâm câriyeyi yüz kırk riyâlî kuruşa bâtten iştirâ ve tesellüm ve def‘-i semen eylediğimden sonra ben dahi câriye-i mezbûreyi işbu hâzır bi’l-meclis Maksud nâm kimesneye yüz otuz riyâlî kuruşa bâtten bey‘ ve teslîm ve kabz-ı semen-i merkūm eylemişdim. Lâkin câriye-i mezbûre gāibe ani’l-meclis Fâtıma bt. Abdülkerim nâm hâtunun mülkünden ibâk etmekle, merkūme Fâtıma câriye-i merkūmeyi mezbûr Maksud muvâcehesinde şuhûd-ı udûl ile isbât ve ba‘de’l-hükm yedinden nez‘ eylediğinden sonra merkūm Maksud semen-i mezbûr yüz otuz riyâlî kuruşu ile bana mürâca‘at edip merkūm Ali Bey yedinden bi’t-tamâm ahz eyledikden sonra hâlâ ben dahi mezbûr Ali Bey’e def‘ eylediğim semen-i merkūm yüz kırk riyâlî kuruşa mürâca‘at edip merkūm Ali Bey yedinden bi’t-tamâm ahz u kabz eyledim. Min ba‘d semen-i merkūmdan mezbûr Ali Bey yedinde bir akçe ve bir habbe hakkım bâkī kalmadı dedikde, mukırr-ı mezbûru ikrâr-ı meşrûhunda el-mukarru lehü’l-merkūm Ali Bey vicâhen tahkīk edicek, mâ vaka‘a bi’t-taleb ketb olundu. Fi’l-yevmi’s-sâlis min şehri Rebî‘ilâhir li sene tis‘a ve hamsîn ve elf. Şuhûdü’l-hâl: Ahmed Çelebi b. Abdülkerim, Mustafa Çelebi b. Abdürrahim, Osman Çelebi b. Mehmed, Yahya Bey b. Zekeriya, Mehmed Beşe b. Mahmud?, Mehmed Bey b. Ali bevvâb-ı Sultânî, Siyavuş b. Abdullah, Mustafa b. Abdullah, Receb b. Veli, Receb b. Hüseyin.