Rumeli Sadareti Mahkemesi 80 Numaralı Sicil (H. 1057-1059/M. 1647-1649) cilt: 15, sayfa: 88 Hüküm no: 64 Orijinal metin no: [16a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Şem‘i Hâtun bt. Mahmud’un Rus câriyesini oğlu Süleyman Ağa b. Mehmed’e sattığı Husûs-ı âti’l-beyânın mahallinde tahrîri iltimâs olunmağın, savb-ı şer‘den Mevlânâ Ahmed Efendi b. Abdülbâkī irsâl olunup ol dahi mahmiye-i İstanbul’da Muhtesib Karagöz mahallesinde Şem‘î Hâtun bt. Mahmud[’un] sâkine olduğu menzile varıp zeyl-i kitâbda mastûrü’l-esâmî müslimîn huzûrunda akd-i meclis eyledikde, mezbûre Şem‘î Hâtun meclis-i mezbûrda sadrî oğlu fahrü’l-akrân Süleyman Ağa b. Mehmed mahzarında bi tav‘ihâ ikrâr ve i‘tirâf edip zikri âtî akdin sudûruna değin silk-i mülk ve yedimde münselik işbu açık kaşlı gök elâ gözlü orta boylu Rûsiyyetü’l-asl müslimetü’l-mille Bâdısabâ bt. Abdullah nâm câriyeyi, oğlum mezbûr Süleyman Ağa’ya on iki bin sekiz yüz fıddî râyic fi’l-vakt akçeye bâtten bey‘ ve teslîm edip ol dahi iştirâ ve tesellüm eyledikden sonra semen-i mezbûrun altı bin dört yüz akçesini oğlum merkūm Süleyman Ağa’ya cihet-i karz-ı şer‘îden zimmetimde deyn olan altı bin dört yüz cedîd akçesine takās edip semen-i bâkī-i mezbûr altı bin dört yüz cedîd akçeyi dahi hâlâ oğlum mezbûr Süleyman Ağa yedinden bi’t-tamâm alıp kabz eyledim. Ba‘de’l-yevm mârrü’z-zikr câriye oğlum merkūm Süleyman Ağa’nın mülk-i müşterâsı ve hakk-ı sırfı olmuşdur dedikde, mukırra-i mezbûreyi ikrâr-ı meşrûhunda el-mukarru lehü’l-mezbûr vicâhen tasdîk ve şifâhen tahkīk edicek, mevlânâ-yı mezbûr dahi mahallinde tahrîr, ba‘dehû meclis-i şer‘a gelip vukū‘u üzre inhâ ve takrîr etmeğin, mâ vaka‘a bi’t-taleb ketb olundu. Hurrire fi’l-yevmi’l-hâmis min şehri Rebî‘ilâhir li sene 1059. Şuhûdü’l-hâl: Ahmed Çelebi b. Mustafa el-yesârî, Mehmed Bey b. Mustafa, Mehmed Çelebi b. İsmail, el-Hâc Yusuf b. Abdullah.