Rumeli Sadareti Mahkemesi 80 Numaralı Sicil (H. 1057-1059/M. 1647-1649) cilt: 15, sayfa: 89 Hüküm no: 65 Orijinal metin no: [16b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İbrahim b. Hüseyin’in emanetinde olan paraları sahiplerine teslim ettiği Vilâyet-i Rumeli’nde nefs-i Atina mahallâtından İskalya mahallesi ahâlîsinden İbrahim b. Hüseyin meclis-i şer‘-i hatîrde, fi’l-asl mahalle-i mezbûre ahâlîsinden olup Kıyıkkapıcı demekle şehîr Osman Ağa b. Mehmed ve mahmiye-i İstanbul’da Arslanhâne kurbunda Kuyumcu Nikola v. Lienardo ve mahrûse-i Galata’da Kürkçükapısı dâhilinde sâkin Yanaki v. Mihal mahzarında takrîr-i kelâm edip zikr olunan İskalya mahallesi sükkânından Arnavud Musli Beşe b. Abdullah bana mezbûr Kapıcı Osman Ağa’ya def‘ için yüz otuz kıt‘a riyâlî kuruş ve mezbûr Kuyumcu Nikola’ya dahi def‘ için otuz riyâlî kuruş ve merkūm Yanaki’ye dahi def‘ için elli riyâlî kuruş def‘ ü teslîm edip ben dahi ahz u tesellüm eylediğimden sonra meblağ-ı mezbûru getirip merkūm Osman Ağa’ya meblağ-ı mezbûr yüz otuz riyâlî kuruşu ve merkūm Kuyumcu Nikola’ya otuz riyâlî kuruşu ve mezbûr Yanaki’ye elli riyâlî kuruşu def‘ ü teslîm eylemişimdir. Hâlâ suâl olunup ikrârları tahrîr olunmak matlûbumdur dedikde, gıbbe’s-suâl mezbûr Osman Ağa minvâl-i muharrer üzre yüz otuz riyâlî kuruşa ahzını her biri bi tav‘ihî ikrâr ve i‘tirâf etmeğin, mezbûrûnun minvâl-i meşrûh üzre ikrârları merkūm İbrahim talebiyle ketb olunup li ecli’l-vesîka yedine def‘ olundu. Hurrire fi’l-yevmi’s-sâlis min şehri Rebî‘ilâhir li sene 1059. Şuhûdü’l-hâl: Yusuf Ağa b. ( ) dizdâr, Mehmed Ağa b. ( ) serdâr-ı atîk, Mehmed Ağa, Mesih Beşe b. Halil, Ali Bey gulâm-ı şâhî.