Rumeli Sadareti Mahkemesi 80 Numaralı Sicil (H. 1057-1059/M. 1647-1649) cilt: 15, sayfa: 90 Hüküm no: 66 Orijinal metin no: [16b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Saliha bt. Hacı Hasan’ın Dilaver b. Abdullah’ta alacağı olduğu Mahmiye-i İstanbul’da Macuncu Kasım mahallesinde sâkine işbu sâhibetü’l-kitâb Saliha Hâtun bt. el-Hâc Hasan meclis-i şer‘-i hatîr-i lâzımü’t-tevkīrde, mahmiye-i mezbûrede Çoban Çavuş mahallesinde Dilaver b. Abdullah nâm kimesne mahzarında üzerine takrîr-i da‘vâ edip mezbûr Dilaver zimmetinde karzdan bir def‘a iki yüz ve bir def‘a yüz kuruş hakkım olup husûs-ı mezbûru alâ re’si’l-işhâd ikrâr dahi etmişken, hâlâ taleb eylediğimde vermede ta‘annüd eder, suâl olunup alıverilmesin taleb eder[im] dedikde, gıbbe’s-suâl ve’l-inkâr müdde‘iyeden vech-i meşrûh üzre müdde‘âsını mübeyyine beyyine taleb olundukda, mahalle-i mezbûrede Bostan mahallesinden Süleyman b. Mehmed ve Ebî Eyyûb-i Ensârî -aleyhi’r-rahmetü’l-bârî- mahallâtından Baba Haydar mahallesinden Reis Mustafa b. Mehmed nâm kimesneler meclis-i şer‘de li ecli’ş-şehâde meclis-i şer‘a [hâzırân] edip fi’l-hakīka işbu Dilaver bizim huzûrumuzda müdde‘iye-i mezbûre Saliha Hâtun’a bir def‘a iki yüz [ve bir def‘a] yüz cem‘an zimmetimde vâcibü’l-edâ ve lâzımü’l-kazâ üç yüz riyâlî guruşu deynim vardır deyû tav‘an ikrâr eyledi, ol vechile meblağ-ı mezbûr üç yüz riyâlî kuruşun işbu Dilaver üzerinde işbu müdde‘iye Saliha Hâtun’a edâsı vâcibdir deynimdir [deynidir], biz bu husûsa bu vech üzre şâhidleriz, şehâdet dahi ederiz deyû her biri edâ-i şehâdet-i şer‘iyye eylediklerinde, ba‘de’t-ta‘dîl ve’t-tezkiye şehâdetleri makbûle oldukdan sonra şehâdet-i mezbûre mûcebince meblağ-ı mezkûr üç yüz riyâlî kuruşu müdde‘iye-i mezkûre Saliha Hâtun’a edâya mezbûr Dilaver üzerine hükm olunup mâ hüve’l-vâki‘ bi’t-taleb ketb olundu. Hurrire fi’l-yevmi’s-sânî min şehri Rebî‘ilâhir li sene 1059. Şuhûdü’l-hâl: Ramazan Çelebi b. Ahmed el-mülâzım, Abdülganî Çavuş b. Abdülkerim, Mumcu Ali Beşe b. Mustafa, Ahmed Çelebi b. Abdülkerim, Yahya Bey [b.] Zekeriya, İsa Bey b. Ahmed, Ahmed Çelebi b. Abdurrahman.