Rumeli Sadareti Mahkemesi 80 Numaralı Sicil (H. 1057-1059/M. 1647-1649) cilt: 15, sayfa: 90 Hüküm no: 67 Orijinal metin no: [17a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hacı Kasım b. Hacı Maksud’un alacaklı olduğu Sefer Ağa b. Bayram ile sulhu Vilâyet-i Anadolu’da Niğde Sancağı’nda Develi kazâsına tâbi‘ Sindelhöyük nâm karye ahâlîsinden el-Hâc Kasım b. el-Hâc Maksud meclis-i şer‘-i hatîr-i lâzımda, sâbıkan karye-i mezbûre zâbiti olan Sefer Ağa b. Bayram tarafından sulh-ı âti’l-beyâna vekîl olup vekâleti bi mâ hüve nehcü’s-sübût şer‘an sâbite olan işbu râfi‘ül-kitâb Mustafa Bey b. Abdullah mahzarında bi’t-tav‘i’s-sâf ikrâr ve i‘tirâf edip bundan akdem mezbûr Sefer Ağa karye-i mezbûre zâbiti iken senin oğlun Ramazan, el-Hâc Hasan nâm kimesnenin bir re’s koyununu serika etmiş deyû beni ahz ve habs edip nâ-hak yedimden bir re’s doru erkek tayımı ve bir re’s doru kısrağımı ve on sekiz re’s koyunumu ve bir kılıcımı ve bir velencemi ve huddâmı için dahi beş kıt‘a riyâlî kuruşumu ahz u kabz eylemişdi. Hâlâ mârrü’z-zikr tayı ve kısrağı ve koyunu ve kaliçeyi ve beş kıt‘a riyâlî kuruşu müvekkil-i mezbûr Sefer Ağa’dan da‘vâ ve taleb eylediğimde, ol dahi inkâr edip benim beyyinem olma[ma]kla beynimize muslihûn tavassut edip da‘vâ-yı mezbûremden beni sulha vekîl olan mezbûr Mustafa Bey ile yirmi üç buçuk riyâlî kuruşa meclis-i sulhda merkūm Mustafa Bey yedinden tamâmen ahz u kabz edip husûs-ı mezbûra müte‘allik âmme-i da‘vâdan asîl-i mezbûr Sefer Ağa’nın zimmetini ibrâ-i âmm-ı kātı‘ü’n-nizâ‘la ibrâ ve iskāt eyledim dedikde, mukırr-ı mezbûru ikrâr-ı meşrûhunda vekîl-i mezbûr vicâhen tasdîk ve şifâhen tahkīk edicek, mâ hüve’l-vâki‘ bi’t-taleb ketb olundu. Sene 1059. Şuhûdü’l-hâl: El-Hâc Sübhan[ver]di b. el-Hâc Mehmed, Hasan b. el-Hâc Sübhanverdi, Sefer Beşe b. ( ) mumcu, Davud Beşe b. Abdullah er-râcil, Hasan Beşe cebe[ci], Mehmed b. Abdullah, Osman [b.] Abdullah ve Yahya Bey b. Zekeriya.