Rumeli Sadareti Mahkemesi 80 Numaralı Sicil (H. 1057-1059/M. 1647-1649) cilt: 15, sayfa: 95 Hüküm no: 72 Orijinal metin no: [18a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hasan’ın küçük kızları İsmihân ve Ümmühâni’nin Ayna bt. Dimo’dan alacaklı olduğu Mahmiye-i İstanbul’da ( ) mahallesinde sâkin iken vefât [eden] Hasan’ın sulbiye sagīre kızları İsmihân [ve] Ümmühâni’nin vâlideleri ve kıbel-i şer‘-i enverden mansûbe vasîleri olan işbu râfi‘atü’l-kitâb Meryem Hâtun bt. Abdullah meclis-i şer‘-i hatîr-i lâzımü’t-tevkīrde, mahmiye-i mezbûrede Samadya kurbunda Zeytun mahallesi sâkinelerinden Ayna bt. Dimo nâm zimmîye muvâcehesinde üzerine takrîr-i da‘vâ edip bundan akdem mezkûre Ayna’ya sagīretân-ı merkūmetân mallarından cihet-i karz-ı şer‘îden üç bin yedi yüz akçe vesâyetim hasebiyle ikrâz ve teslîm edip ol dahi minvâl-i muharrer üzre iktirâz ve ahz u kabz eylemişdir. Hâlâ taleb ederim dediğimde edâda ta‘annüd eder hâlâ suâl olunup bi hükmi’l-vesâye alıverilmesin taleb eder[im] dedikde, gıbbe’s-suâl mezkûre Ayna dahi cevâbında, fi’l-vâki‘ sagīretân-ı mezkûretân İsmihân ve Ümmühâni’nin vasîleri ve vâlideleri mezbûre Meryem Hâtun yedinden mâl-ı sagīretândan üç [bin] yedi yüz akçe istikrâz ve kabz ve mesârifime sarfla meblağ-ı mezbûr sagīretâna zimmetimde lâzımü’l-edâ deynimdir deyû bi tav‘ihâ ikrâr ve i‘tirâf etmeğin, ikrâr[ı] mûcebince meblağ-ı mezbûrun vasiyy-i mezbûreye edâsına merkūm Ayna üzerine hükm olunup mâ vaka‘a bi’t-taleb ketb olundu. Fi’l-yevmi’t-tâsi‘ mine’ş-şehri Rebî‘ilâhir li sene tis‘a ve hamsîn ve elf. Şuhûdü’l-hâl: Fahrü’l-cüyûş Mustafa Çavuş b. Ahmed el-mübâşir, Mustafa Çavuş b. Mehmed, Mustafa Çelebi b. Abdülhalim, Mehmed Bey b. ( ) el-mübâşir.