Rumeli Sadareti Mahkemesi 80 Numaralı Sicil (H. 1057-1059/M. 1647-1649) cilt: 15, sayfa: 95 Hüküm no: 73 Orijinal metin no: [18b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Abdülbâki b. Kemaleddin’in tasarrufundaki vakıf dükkânı Mehmed Beşe b. İvaz’a bıraktığı Vilâyet-i Anadolu’da vâki‘ Günyüzü kazâsına tâbi‘ Gecek nâm karye ahâlîsinden Abdülbâkī b. Kemaleddin nâm kimesne meclis-i şer‘-i hatîr-i lâzımü’t-tevkīrde, ketenci tâifesinden işbu sâhibü’l-kitâb Mehmed Beşe b. İvaz mahzarında tav‘an ikrâr ve i‘tirâf edip Dârü’l-hilâfeti’l-aliyye mahmiye-i Kostantıniyye’de Saraçhâne kurbunda Hüsam Bey mahallesinde vâki‘ üç tarafı yine vakf-ı mezbûra ve bir tarafı tarîk-i âm ile mahdûd bir bâb ketenci dükkânı merhûm el-Hâc İlyas Vakfı’ndan olup icâre-i mu‘accele-i ma‘lûme ve beher mâh on beş akçe ücret-i müeccele ile babam mezbûrun ile’l-vefât tasarrufunda olup ba‘de vefâtihî mârrü’z-zikr dükkân intikāl-i âdî ile bana isâbet ve intikāl eylediğinden sonra hâlâ ben dahi sâlifü’z-zikr cemî‘ dükkânı kâffe-i hukūkuyla mezbûr Mehmed Beşe’ye iki bin fıddî râyic fi’l-vakt akçe mukābelesinde vakf-ı mezbûr mütevellîsi ma‘rifetiyle ferâğ ve tefvîz ve teslîm edip ol dahi vech-i muharrer üzre tefevvüz ve tesellüm ve kabûl ettikden sonra mukābele-i ferâğ olan meblağ-ı mezbûr iki bin akçeyi mezbûr Mehmed Beşe yedinden tamâmen ahz u kabz eyledim. Ba‘de’l-yevm zikr olunan dükkân-ı mezbûr Mehmed Beşe’nin hakk-ı müfevvezidir dedikde, mukırr-ı mezbûrun vech-i meşrûh üzre cârî ve sâdır olan ikrârını el-mukarru lehü’l-mezbûr vicâhen tasdîk ve şifâhen tahkīk edicek, mâ hüve’l-vâki‘ bi’t-taleb ketb olundu. Hurrire fi’l-yevmi’l-hâmis min şehri Rebî‘ilâhir li sene 1059. Şuhûdü’l-hâl: El-Hâc İvaz b. Hacı, Hasan b. İbrahim, Ali Baba b. Yusuf, Mustafa b. Abdullah.