Rumeli Sadareti Mahkemesi 80 Numaralı Sicil (H. 1057-1059/M. 1647-1649) cilt: 15, sayfa: 100 Hüküm no: 79 Orijinal metin no: [20a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yorgi v. Vartalmo’nun alacaklı olduğu Vasil Reis v. Akas ve Aleksandri v. Lefter’in zimmetlerini ibra ettiği Rodos ahâlîsinden Yorgi v. Vartalmo nâm zimmî meclis-i şer‘-i hatîr-i lâzımü’t-tevkīrde, vilâyet-i Anadolu’da Sürmene Kasaba[sı] ahâlîsinden Vasil Reis v. Akas ve Aleksandra v. Lefter nâm zimmîler mahzarlarında bi’t-tav‘ ikrâr ve i‘tirâf edip merkūmân Vasil Reis ve Aleksandra zimmetlerinde karz-ı şer‘îden yüz yirmi kıt‘a riyâlî kuruş hakkım olup hâlâ meblağ-ı mezbûrdan altmış riyâlî kuruşu merkūmân yedlerinden ahz u kabz edip meblağ-ı bâkī altmış kıt‘a riyâlî kuruş da‘vâsından berî olup merkūmân Vasil Reis ve Aleksandra’nın zimmetlerini ibrâ-i âmm-ı kātı‘ü’n-nizâ‘la ibrâ ve iskāt-ı tâmm-ı râfi‘ü’l-hisâm ile iskāt eyledim. Min ba‘d meblağ-ı bâkī-i mezbûr altmış kıt‘a riyâlî kuruşa müte‘allik merkūmân Vasil Reis ve Aleksandra üzerlerine bi vechin mine’l-vücûh ve sebebin mine’l-esbâb da‘vâ ve nizâ‘ ve hakkım yokdur dedikde, mukırr-ı mezbûru ikrâr-ı meşrûhunda el-mukarru lehü’l-merkūmân vicâhen tasdîk ve şifâhen tahkīk edicek, mâ vaka‘a bi’t-taleb ketb olundu. Hurrire fi’l-yevmi’r-râbi‘ min şehri Rebî‘ilâhir li sene tis‘a ve hamsîn ve elf. Şuhûdü’l-hâl: Hüseyin Çavuş b. Ferhad el-mübâşir, Ali Çavuş b. Mehmed, Mustafa Çavuş b. Mehmed, Ahmed Çelebi b. Abdurrahman.