Rumeli Sadareti Mahkemesi 80 Numaralı Sicil (H. 1057-1059/M. 1647-1649) cilt: 15, sayfa: 100 Hüküm no: 80 Orijinal metin no: [20b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mustafa Bey b. Taşkun’un alacaklı olduğu Anadolu beylerbeyi Hacı İbrahim Paşa b. Abdullah ile sulhu Gedüs kazâsına tâbi‘ Pazar nâm karyeden Mustafa Bey b. Taşkun meclis-i şer‘-i şerîfde, sâbıkan Anadolu Eyâleti’ne mutasarrıf olan düstûr-ı mükerrem müşîr-i müfahham el-Hâc İbrahim Paşa b. Abdullah tarafından sulh-ı âti’l-beyâna vekîl olup vekâleti bi mâ hüve nehcü’s-sübût şer‘an sâbite olan Mısırlı Mehmed Çavuş b. Abdülkerim mahzarında tav‘an ikrâr ve i‘tirâf edip müvekkil-i mûmâ-ileyh eyâlet-i mezbûreye mutasarrıf iken, sen kan etmişsin deyû benden iki yüz otuz riyâlî kuruşumu nâ-hak ahz u kabz edip hâlâ zafer bulduğumda meblağ-ı mezbûr iki yüz otuz riyâlî kuruşu müvekkili mûmâ-ileyh el-Hâc İbrahim Paşa’dan da‘vâ ve taleb eylediğimde, ol dahi bi’l-külliye inkâr edip adem-i beyyinem ile yemîn sadedinde iken beynimize muslihûn tavassut edip meblağ-ı mezkûr iki yüz otuz riyâlî kuruş hakkım da‘vâsından beni sulha vekîl olan mezbûr Mısırlı Mehmed Çavuş ile an-inkâr yirmi beş riyâlî kuruş üzerine inşâ-i akd-i sulh eylediklerinde, ben dahi sulh-ı mezbûru kabûl ve bedel-i sulh olan meblağ-ı mezbûr yirmi beş riyâlî kuruş vekîl-i mezbûr Mısırlı Mehmed Çavuş yedinde tamâmen ahz u kabz eyleyip min ba‘d meblağ-ı müdde‘â iki yüz otuz riyâlî kuruş da‘vâsından mûmâ-ileyh el-Hâc İbrahim Paşa’nın ve kethüdâsı Ebûbekir Ağa b. Mustafa’nın ve etbâ‘ından Ali Ağa b. Abdullah’ın zimmetini ibrâ-i âmm-ı kātı‘ü’n-nizâ‘la ibrâ ve iskāt eyledim. Min ba‘d müvekkili mûmâ-ileyh el-Hâc İbrahim Paşa ve etbâ‘ı mezbûrûn üzerinde meblağ-ı müdde‘â iki yüz otuz riyâlî kuruşa müte‘allika bi vechin mine’l-vücûh ve sebebin mine’l-esbâb da‘vâ ve nizâ‘ım ve alâka ve hakkım kalmadı dedikde, vekîl-i mezbûr Mısırlı Mehmed Çavuş bi’l-muvâcehe tasdîk ve bi’l-müşâfehe tahkīk edicek, mâ hüve’l-vâki‘ bi’t-taleb ketb ü imlâ olundu. Fi’l-yevmi’r-râbi‘ [min] şehri Rebî‘ilâhir li sene tis‘a ve hamsîn ve elf. Şuhûdü’l-hâl: Hamza Beşe b. Ahmed, Mehmed Beşe b. Mustafa, Mustafa Çavuş b. Hasan, el-Hâc Hüseyin b. Hasan.