Rumeli Sadareti Mahkemesi 80 Numaralı Sicil (H. 1057-1059/M. 1647-1649) cilt: 15, sayfa: 101 Hüküm no: 81 Orijinal metin no: [20b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Papa Polo v. Milo, Baroş v. Evren ve Yani v. İstamo’nun Bayram Çavuş b. Mustafa’ya borçları olduğu Vilâyet-i Rumeli’nde Dimetoka kazâsına tâbi‘ Küçük nâm karyeden Papa Polo v. Milo ve Baroş v. Evren ve Yani v. İstamo nâm zimmîler meclis-i şer‘-i hatîr-i lâzımü’t-tevkīrde, işbu râfi‘ül-kitâb Bayram Çavuş b. Mustafa mahzarında her biri bi’t-tav‘i’s-sâf ikrâr ve i‘tirâf edip mezbûr Bayram Çavuş yedinden karyemizin ba‘zı mesâlihi için ma‘an yirmi altı bin fıddî râyic fi’l-vakt akçe istikrâz ve ahz u kaz edip ve mesâlih-i karye-i mezbûreye sarfla meblağ-ı mezbûr merkūm Bayram Çavuş’a zimmetimizde lâzımü’l-edâ deynimiz olduğundan gayrı mezbûr Bayram Çavuş yedinden müşterâ ve makbûz semeni târih-i kitâbdan dört ay tamâmına değin müeccel olmak üzre dört zirâ‘ yeşil karkaşone? çuka semeninden dahi sekiz yüz cedîd akçe merkūm Bayram Çavuş’a zimmetimizde lâzımü’l-edâ ve vâcibü’l-kazâ deynimiz olduğundan sonra meblağ-ı mezbûrdan her birimiz âharın zimmetine lâzım gelen meblağa ehad-ı tarafeynin emriyle kefâlet-i sahîha-i şer‘iyye ile kefîl olduk dediklerinde, mukırrûn-ı mezbûrûnu ikrâr-ı meşrûhlarında el-mukarru lehü’l-mezbûr vicâhen tasdîk ve şifâhen tahkīk eyledikden sonra meblağ-ı mezbûrun mecmû‘una mahmiye-i İstanbul’da Sultan Selim kurbunda Hoca Yunus mahallesinde sâkin Osman Çavuş b. Abdullah dahi tarafeynden emr ve kabûlü hâviye kefâlet-i sahîha-i şer‘iyye ile kefîl olmağın, mâ hüve’l-vâki‘ bi’t-taleb ketb olundu. Hurrire fi’l-yevmi’s-sâlis min şehri Rebî‘ilâhir li sene tis‘a ve hamsîn ve elf. Şuhûdü’l-hâl: Hüseyin Çavuş b. Mehmed, Mustafa Çelebi b. Receb Efendi, Ahmed Efendi b. Abdullah, Ahmed Çelebi b. Abdurrahman.