Rumeli Sadareti Mahkemesi 80 Numaralı Sicil (H. 1057-1059/M. 1647-1649) cilt: 15, sayfa: 102 Hüküm no: 82 Orijinal metin no: [21a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Râbia bt. Mehmed ile Abdülkerim b. Hacı Ali’nin boşandığı Husûs-ı âti’l-beyânı mahallinde tahrîr için bi’l-iltimâs cânib-i şer‘-i enverden irsâl olunan Mevlânâ Sunullah Efendi b. Ebûbekir mahmiye-i İstanbul’da Oruc Gāzi mahallesinde vâki‘ Abdülkerim Efendi b. el-Hâc Ali’nin icâre ile sâkin olduğu menzile varıp huzûr-ı müslimînde akd-i meclis eyledikde, menzil-i mezbûrda sâkine Râbia Hâtun bt. Mehmed Efendi meclis-i merkūmda zevci işbu râfi‘ül-kitâb mezbûr Abdülkerim Efendi mahzarında tav‘an ikrâr ve takrîr-i kelâm edip mezbûr Abdülkerim Efendi’nin zevce-i menkûhası iken beynimizde şikāk ve bir birimizden nizâ‘ ve a‘râz vâki‘ olmakla, mezbûr Abdülkerim Efendi’nin zimmetinde nikâhım ma‘kūd yirmi bin cedîd râyic fi’l-vakt akçe mehr-i müeccelimin dokuz bin altı yüz akçesi mukābelesinde işbu uzun boylu açık kaşlı ayakları eğri esvedü’l-levn zenciyyetü’l-asl müslimetü’l-mille Fâtıma bt. Abdullah nâm câriyesini alıp kabz eyledikden sonra on bin dört yüz akçe mehr-i müeccel üzerine ve nafaka-i iddetim ve me’ûnet-i süknâm üzerine ve bin elli beş senesi gurresinde târih-i kitâb gurresine gelinceye değin yevmî beş akçeden kırk dört ayda müctemi‘ olan otuz üç bin akçe nafaka-i mefrûzam üzerine mezbûr Abdülkerim Efendi ile tav‘an muhâla‘a edip zevciyyet da‘vâ[sın]dan ve târih-i kitâba gelince cemî‘ da‘vâ ve mütâlebât ve eymân ve muhâsamâtdan birbirimizin zimmetini ibrâ-i âmm-ı kātı‘ü’n-nizâ‘la ibrâ eyledik. Min ba‘d merkūm Abdülkerim üzerine bi vechin mine’l-vücûh ve sebebin mine’l-esbâb da‘vâ ve hakkım yokdur dedikde, mezbûr Abdülkerim Efendi vech-i meşrûh üzre hul‘ ve ibrâ eylediğini vicâhen tasdîk ve şifâhen tahkīk etmeğin, mâ hüve’l-vâki‘ hâli mevlânâ-yı mezbûr mahallinde ketb ve tahrîr, ba‘de meclis-i şer‘a gelip alâ vukū‘ihî ihbâr ve takrîr etmeğin, mâ hüve’l-vâki‘ bi’t-taleb ketb olundu. Fi’l-yevmi’r-râbi‘ [min] şehri Rebî‘ilâhir li sene tis‘a ve hamsîn ve elf. Şuhûdü’l-hâl: Mehmed Efendi b. es-Seyyid ( ), Abdülbâkī Çelebi b. Hasan, Fethi Efendi b. Halil el-müderris, Mehmed Ağa b. Mahmud, Ali Bey b. Ahmed, Mehmed b. Ahmed, Ali b. İbrahim.