Rumeli Sadareti Mahkemesi 80 Numaralı Sicil (H. 1057-1059/M. 1647-1649) cilt: 15, sayfa: 106 Hüküm no: 88 Orijinal metin no: [22b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hacı Mehmed’e ait olup Süleymaniye Dârüşşifâsı’na emanet konulan katırın sahibinden haber çıkmaması üzerine tabhâne için satıldığı Mahmiye-i İstanbul’da hâlâ Süleymaniye Dârü’ş-şifâsı’nda reis-i etıbbâ olan Atâzâde Ahmed Efendi tarafından bey‘-i âti’l-beyâna vekîl olup vekâleti bi mâ hüve nehcü’s-sübût şer‘an sâbite olan Tabîb-i Sâlis es-Seyyid İbrahim Çelebi b. ( ) meclis-i şer‘de takrîr-i kelâm edip el-Hâc Mehmed nâm mükârî iki re’s katırını bin elli dokuz Saferi evâsıtında zikr olunan Süleymaniye Tabhânesi ahûrunda koyup kendi gaybet-i münkatı‘a ile gaybet etmekle, zikr olunan tabhânenin mâl-ı mefkūd beytülmâlı dârü’ş-şifâsına mahsûl kayd olmakla, müvekkilim mezbûr Ahmed Efendi dahi ber-mûceb-i kayd-ı meşrûh mâl-ı mefkūd beytülmâl emîni olması hasebiyle zikr olunan katırları kırk günden mütecâviz ve sâhibine rücû‘ şartıyla yevmî onar akçe nafaka nakd-i mefrûza ile infâk eylemişdir. Hâlâ müddet-i örfiyyeleri tamâm olmakla, sıyâneten li mâli’l-mâlik zikr olunan katırların bey‘ olunmasına kıbel-i şer‘den izin taleb ederim dedikden sonra zikr olunan iki re’s katır gāib-i mezbûrun olduğu müddet-i örfiyyeleri dahi münkaziye olduğu hâkim-i muvakki‘-i kitâb huzûrunda şer‘an sâbit oldukdan sonra bey‘a izin verip, zikr olunan katırlar sûk-ı sultânîde bey‘ men‘ yezîd olunup rağabât-ı nâs bi’l-külliye münkatı‘a oldukdan sonra iki bin üç yüz akçe işbu hâzır bi’l-meclis Musa Efendi b. İlyas’ın üzerinde karâr edip ziyâde ile tâlib-i âhar olmadığı mütehakkık oldukdan sonra hâkim-i muvakki‘-i kitâbdan bey‘a emr-i şer‘î sudûrundan sonra mezbûr es-Seyyid İbrahim Çelebi zikr olunan katırları mezbûr Musa Efendi’ye iki bin üç yüz râyic fi’l-vakt akçe[ye] tarafeynden îcâb ve kabûlü hâvî bey‘-i kat‘î ile bey‘ edip beytülmâl emîni yedinden bi’t-tamâm ahz u kabz ve tesellüm etmeğin, mâ vaka‘a bi’t-taleb ketb olundu. Fi’l-yevmi’s-sâdis min şehri Rebî‘ilâhir sene 1059. Şuhûdü’l-hâl: Ahmed Efendi b. Abdülbâkī, Mustafa Çelebi b. Abdurrahman, Kâtibü’l-hurûf Mustafa Çelebi b. Hasan Efendi, Hüseyin Çelebi b. Abdi.