Rumeli Sadareti Mahkemesi 80 Numaralı Sicil (H. 1057-1059/M. 1647-1649) cilt: 15, sayfa: 107 Hüküm no: 89 Orijinal metin no: [23a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Varvar Ali Paşa’nın oğlu ve vârisi Mustafa Bey’in idam edilen babasında kalan alacağının terekeden tahsili Husûs-ı âti’l-beyânın mahallinde istimâ‘ı lâzım gelmeğin, bi’l-iltimâs hâkim-i muvakki‘-i kitâb tûbâ-lehû ve hüsnü me’âb dahi mahmiye-i İstanbul’da Emin Nureddin mahallesinde hâlâ çavuşbaşı olan umdetü’l-emâcid ve’l-ekârim Abdülfettâh Ağa b. Mehmed’in çavuşbaşılık için ittihâz eylediği menzile varıp akd-i meclis-i şer‘-i şerîf eyledikde, bundan akdem eyâlet-i Rum’dan ma‘zûl olup katl olunan Varvar Ali Paşa b. Behram’ın sulbî kebîr oğlu Mustafa Bey meclis-i ma‘kūdda, müteveffâ-yı mezbûr üzerine li ecli isbâti’d-düyûn hâkim-i muvakki‘-i mûmâ-ileyh vasî nasb edip vesâyeti kabûl eden Cafer Çavuş b. Sefer mahzarında üzerine takrîr-i da‘vâ edip babam ve mûrisim müteveffâ-yı mezkûr Varvar Ali Paşa benim berât-ı âlîşân ile mutasarrıf olup Vidin Sancağı’nda Vulkavaslavna? nâm ze‘âmetin senede altı bin riyâlî kuruş mahsûlünü ahz u kabz ve mesârifine sarfla istihlâk eyledikden sonra hâl-i sıhhat ve nefâz-ı tasarrufâtında, benim için oğlum Mustafa’nın ze‘âmeti mahsûlünden istihlâk eylediği altı bin riyâlî kuruş oğlum Mustafa’ya zimmetimde vâcibü’l-edâ deynim vardır deyû tav‘an ikrâr dahi eylemişdir, vefât edip zimmetinde meblağ-ı mezkûr altı bin riyâlî kuruşu kalmışdır suâl olunup terekesinden alıverilmesin taleb ederim dedikde, gıbbe’s-suâl vasiyy-i mezbûr inkâr edicek, müdde‘î-i mezbûr Mustafa Bey’den da‘vâ-yı meşrûhasını mübeyyine beyyine taleb olundukda, udûl-i ahrâr-ı ricâl-i müslimînden olup mahmiye-i mezbûrede Cerrâh Câmi‘i kurbunda Kürkçübaşı mahallesinde sâkin Abdürrahim Ağa b. Mehmed Ağa ve Ayasofya-i Kebîr’de Haseki odalarında sâkin Kasım Bey b. Hüseyin nâm kimesneler meclis-i ma‘kūda li ecli’ş-şehâde hâzırân olup gıbbe’l-istişhâd her biri şehâdet edip fi’l-hakīka işbu Mustafa Bey’in baba ve mûrisi müteveffâ-yı mezkûr Varvar Ali Paşa hâl-i sıhhat ve nefâz-ı tasarrufâtında bezim huzûrumuzda işbu müdde‘î Mustafa Bey için oğlum Mustafa’nın Vidin Sancağı’nda Vulkavasla[v]na? nâm ze‘âmetinin senede altı bin riyâlî kuruş mahsûlünü ahz u kabz ve mesârifine sarf edip meblağ-ı mezkûr altı bin riyâlî kuruş <> oğlum Mustafa’ya zimmetimde vâcibü’l-edâ ve lâzımü’l-kazâ deynimdir deyû tav‘an ikrâr eyledi, ikrâr mûcebince meblağ-ı mezkûr altı bin riyâlî kuruş işbu müdde‘î Mustafa Bey’in babası müteveffâ-yı mezkûr Varvar Ali Paşa zimmetinde hakkıdır, vefât edip zimmetinde kalmağla, terekesinden edâsı vâcibdir, biz bu husûsa şâhidleriz şehâdet dahi eder[iz] deyû her biri zikr olunan vasiyy-i mezbûr muvâcehesinde edâ-i şehâdet-i şer‘iyye eylediklerinde, gıbbe ri‘âyeti şerâyiti’l-kabûl şehâdetleri makbûle oldukdan sonra mezbûr Mustafa Bey’e meblağ-ı müdde‘â altı bin riyâlî kuruşu müteveffâ-yı mezbûr Varvar Ali Paşa’dan hâl-i hayâtında küllen ve ba‘zan asâleten ahz u kabz eylemediğine veya âhara havâle olmadığına veya turuk-ı şer‘iyyeden bir tarîk ile müteveffâ-yı mezbûrun zimmetini ibrâ ve iskāt eylemediğine yemîn [teklîf] olundukda, ol dahi hasbe’l-mes’ûl yemîn billâhi’l-aliyyi’l-azîm edicek, şehâdet-i mezbûre mûcebince meblağ-ı müdde‘â altı bin riyâlî kuruşun müdde‘î-i mezbûra tereke-i müteveffâ-yı mezbûrdan edâsına hükm-i şer‘î ile hükm olunmuşdur, mâ hüve’l-vâki‘ bi’t-taleb ketb olundu. Hurrire fi’l-yevmi’t-tâsi‘ ve’l-ışrîn min şehri Rebî‘ilevvel li sene tis‘a ve hamsîn ve elf. Şuhûdü’l-hâl: Abdülganî Efendi b. Ömer el-müderris, İsmail Efendi b. İbrahim kâtib-i dîvân, Halid Ağa b. Mustafa, Ömer Bey b. Hüseyin.