Rumeli Sadareti Mahkemesi 80 Numaralı Sicil (H. 1057-1059/M. 1647-1649) cilt: 15, sayfa: 109 Hüküm no: 91 Orijinal metin no: [23b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Vefat eden Mustafa Efendi b. İlyas’ın câriyesi Zamâne’nin hür olduğu Sâbıkan Silistire beylerbeyisi olan düstûr-ı mükerrem müşîr-i müfahham İbrahim Paşa dîvân efendisi ve bostancı oturağı olup mahmiye-i İstanbul’da Nevbethâne mahallesinde sâkin iken vefât eden Mustafa Efendi b. İlyas’ın li ebeveyn karındaşları ve vârisleri Zülfikār ve Abdurrahman b. İlyas nâm kimesneler meclis-i şer‘-i hatîr-i lâzımü’t-tevkīrde, işbu bâ‘isetü’l-kitâb açık kaşlı kara gözlü sağ haddinde et beni olan Zamâne nâm hürre muvâcehesinde bi tav‘ihimâ ikrâr ve takrîr-i kelâm edip mûrisimiz mezbûr Mustafa Efendi’nin yedinde ve terbiyesinde olan mezbûre Zamâne vilâyet-i Bosna’da Travnik nâm kasabada sâkin Marko nâm zimmî ve Aniçe zimmîyeden mütevellîde olup hürretü’l-asldır, bi vechin mine’l-vücûh ve sebebin mine’l-esbâb üzerine da‘vâ ve nizâ‘ımız yokdur dediklerinde, mukırrân-ı mezbûrân Zülfikār ve Abdurrahman’ı minvâl-i meşrûh üzre cârî ve sâdır olan ikrârlarında el-mukarru lehâ’l-mezbûre Zamâne bi’l-muvâcehe tasdîk ve bi’l-müşâfehe tahkīk [edicek], mâ hüve’l-vâki‘ bi’t-taleb ketb olundu. Fi’l-yevmi’r-râbi‘ min şehri Rebî‘ilâhir li sene tis‘a ve hamsîn ve elf. Şuhûdü’l-hâl: Ali Çavuş b. Hasan, Mahmud b. Abdullah, İbrahim b. Mehmed, Hüseyin b. Mustafa, Yahya Bey, Ahmed Çelebi [b.] Abdülbâkī, Osman Çelebi b. Mehmed, Mustafa Çelebi b. Abdurrahman, Mustafa b. Mehmed.