Rumeli Sadareti Mahkemesi 80 Numaralı Sicil (H. 1057-1059/M. 1647-1649) cilt: 15, sayfa: 110 Hüküm no: 92 Orijinal metin no: [23b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İlya v. Mosi’nin idam edilen Varvar Ali Paşa’daki alacağının terekesinden ödenmesi Husûs-ı âti’l-beyânın sudûrunun mahallinde istimâ‘ı lâzım gelmekle, bi’l-iltimâs hâkim-i muvakki‘-i [kitâb] tûbâ-lehû ve hüsnü me’âb dahi mahmiye-i İstanbul’da Emin Nureddin mahallesinde hâlâ çavuşbaşı olan umdetü’l-emâcid ve’l-ekârim Abdülfettâh Ağa b. Mehmed’in çavuşbaşılık için ittihâz eylediği menzile varıp akd-i meclis-i şer‘-i şerîf eyledikde, mahmiye-i İstanbul’da sâkin ( ) cemâ‘atinden İlya v. Mosi nâm Yahudi meclis-i ma‘kūdda, bundan akdem eyâlet-i Rum’dan ma‘zûl olup katl olunan Varvar Ali Paşa [b.] Behram’ın sulbî kebîr oğlu ve vârisi olup terekesine vaz‘-ı yed eden Mustafa Bey nâm şâbb-ı âkil ve bâliğ mahzarında üzerine takrîr-i da‘vâ edip işbu Mustafa Bey’in baba ve mûrisi müteveffâ-yı mezbûrdan cihet-i düyûn-ı şer‘îden üç yüz altmış riyâlî kuruş hakkım olup meblağ-ı mezkûrdan yüz elli riyâlî kuruşunu hâl-i sıhhatinde ahz u kabz eyleyip bâkī iki yüz on riyâlî kuruş hakkım mezbûr Varvar Ali Paşa vefât edip zimmetinde kalmağla, terekesinden alıverilmesin taleb ederim suâl olunsun dedikde, gıbbe’s-suâl husûs-ı mezkûru mezbûr Mustafa Bey inkâr edicek, müdde‘î-i mezbûr İlya’dan da‘vâ-yı meşrûhasını mübeyyine beyyine taleb olundukda, udûl-i müslimînden olup mahmiye-i İstanbul’da Esirci Kemal mahallesinde sâkin Abaza Mehmed Ağa b. Abdullah ve Melek Ahmed Paşa etbâ‘ından el-Hâc Ahmed Bey b. Bekir Çelebi nâm kimesneler meclis-i ma‘kūda li ecli’ş-şehâde hâzırân olup gıbbe’l-istişhâd her biri şehâdet edip fi’l-hakīka işbu Mustafa Bey’in babası ve mûrisi Varvar Ali Paşa zimmetinde işbu müdde‘î İlya’nın cihet-i deyn-i şer‘îden üç yüz altmış riyâlî kuruş hakkı olup meblağ-ı mezkûrun yüz elli riyâlî kuruşunu işbu İlya ahz edip bâkī iki yüz on riyâlî kuruş hakkı mezbûr Varvar Ali Paşa vefât edip zimmetinde kalmağla terekesinden edâsı vâcibdir, biz bu husûsa şâhidleriz şehâdet dahi ederiz deyû her biri münkir-i mezbûr muvâcehesinde edâ-i şehâdet-i şer‘iyye eylediklerinde, gıbbe ri‘âyeti şerâyiti’l-kabûl şehâdetleri makbûle oldukdan sonra mezbûre İlya[’ya] meblağ-ı müdde‘â iki yüz on riyâlî kuruşu müteveffâ-yı mezbûr Varvar Ali Paşa’dan hâl-i hayâtında küllen veya ba‘zan asâleten [veya] vekâleten ahz eylemediğine veya âhara havâle olmadığına veya turuk-ı şer‘iyyeden bir tarîk ile müteveffâ-yı mezbûrun zimmetini ibrâ eylemediğine yemîn [teklîf] olundukda, ol dahi hasbe’l-mes’ûl yemîn billâhi’llezî enzele’t-Tevrat alâ Musa -aleyhi’s-selâm- edicek, şehâdet-i mezbûre mûcebince meblağ-ı müdde‘â iki yüz on riyâlî kuruşu müdde‘î-i mezbûra tereke-i müteveffâ-yı mezbûrdan edâsına mezbûr Mustafa Bey mahzarında müteveffâ-yı mezbûr üzerine hükm-i şer‘î ile hükm olunup mâ vaka‘a bi’t-taleb ketb olundu. Fi’l-yevmi’s-sânî min şehri Rebî‘ilâhir li sene tis‘a ve hamsîn ve elf. Şuhûdü’l-hâl: El-Hâc İbrahim b. Mahmud, Cafer Çavuş b. Sefer, Mustafa Bey b. Davud Paşa mîr-livâ, Ahmed Çavuş b. Bektaş Çavuş ve gayruhüm.