Rumeli Sadareti Mahkemesi 80 Numaralı Sicil (H. 1057-1059/M. 1647-1649) cilt: 15, sayfa: 111 Hüküm no: 93 Orijinal metin no: [24a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Fırıncı Nazar’ın Hasan Ağa’ya olan kira borçlarına karşılık olarak bazı eşyalarını takas ettiği Medîne-i Üsküdar’da Mehmed Paşa mahallesinde sâkin Dergâh-ı [âlî] yeniçerilerinin doksan beşinci cemâ‘atin Çorbacısı Hasan Ağa b. Abdullah tarafından şirâ-i âti’l-beyâna ve takās-ı semene vekîl olup vekâleti bi mâ hüve nehcü’s-sübût şer‘an sâbite olan Mehmed Beşe b. Yusuf meclis-i şer‘-i hatîrde, ekmekçi tâifesinden işbu sâhibü’l-vesîka Nazar v. Apran nâm Ermeni dahi muvâcehesinde tav‘an bi’l-vekâle ikrâr ve i‘tirâf edip müvekkilim mezbûr Hasan Ağa’nın yedinde mülk hakkı olup medîne-i mezbûrede Yasakçılar sûkunda vâki‘ lede’l-ahâlî ma‘lûmü’l-hudûd ekmekçi fırını müvekkilim mezbûr bundan akdem ayda bin yüz fıddî râyic fi’l-vakt akçeye mezbûr Nazar’a îcâr ve teslîm edip ol dahi ekmek tabhı için istîcâr ve tesellüm ve tasarruf eyleyip târih-i kitâba gelince altı ayda altı bin fıddî râyic fi’l-vakt akçe icâre mezbûr Nazar üzerinde cem‘ oldukda mezbûr Nazar fesh-i akd-i icâre eyle[dikde]n sonra yedinde ve zikr olunan fırında mülkü ve hakkı olan yüz keyl tuzu ve yirmi beş aded …? ve dört çeki odununu ve iki ekmek küreğini ve bir tahta sandığını ve bir müsta‘mel beyaz kebesini bana bin altı yüz fıddî râyic fi’l-vakt akçeye bey‘-i bâtla bey‘ ve teslîm edip ben dahi müvekkilim mezbûr için iştirâ ve tesellüm edip semen-i mezkûr altı bin altı yüz akçeyi bâyi‘-i mezbûr Nazar’a icâre-i mezkûre zimmetinde müvekkilim mezbûrun hakkı olan altı bin altı yüz akçeye bi’t-terâzî takās edip zikr olunan cemî‘ fırını müvekkilim mezbûra teslîm edip müvekkilim mezbûrun icâre-i mezkûreye müte‘allika mezbûr Nazar üzerinde da‘vâ ve hakkı kalmadı dedikde, vekîl-i mezbûr Mehmed Beşe’yi ikrâr-ı meşrûhunda el-mukarru lehü’l-mezbûr Nazar vicâhen tahkīk edicek, mâ hüve’l-vâki‘ bi’t-taleb ketb olundu. Fî gurreti şehri Rebî‘ilâhir li sene [tis‘a] ve hamsîn ve elf. Şuhûdü’l-hâl: Ahmed Çelebi b. Abdülbâkī, Osman Çelebi b. Mehmed, Mustafa Çelebi [b.] Abdurrahman, Yahya Bey b. Zekeriya.