Rumeli Sadareti Mahkemesi 80 Numaralı Sicil (H. 1057-1059/M. 1647-1649) cilt: 15, sayfa: 111 Hüküm no: 94 Orijinal metin no: [24a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yorgi v. Yani’nin Yani v. Kosta’da alacağı olduğu Mahmiye-i İstanbul’da bakkal tâifesinden Yorgi v. Yani nâm zimmî meclis-i şer‘-i hatîrde, yine tâife-i mezbûreden olup Unkapanı’nda sâkin Yani v. Kosta muvâcehesinde üzerine takrîr-i da‘vâ edip işbu Yani zimmetinde karz-ı şer‘îden üç bin beş yüz fıddî-i cedîd râyic fi’l-vakt akçe hakkım olup hâlâ meblağ-ı mezbûru merkūm Yani bana edâdan imtinâ‘ eder, suâl olunup alıverilmesin taleb eder[im] dedikde, gıbbe’s-suâl merkūm Yani fi’l-hakīka müdde‘î-i mezbûra karz-ı şer‘îden üç bin beş yüz fıddî râyic fi’l-vakt akçe zimmetimde lâzımü’l-edâ ve vâcibü’l-kazâ deynimdir deyû bi tav‘ihî ikrâr ve i‘tirâf etmeğin, ikrârı mûcebince meblağ-ı mezbûrun müdde‘î-i mezbûra edâsına merkūm Yani üzerine ilzâm olunup mâ vaka‘a bi’t-taleb ketb olundu. Hurrire fi’l-yevmi’s-sâmin min şehri Rebî‘ilevvel li sene tis‘a ve hamsîn ve elf. Şuhûdü’l-hâl: İbrahim Beşe b. Osman, İsmail Çelebi b. Yusuf, Mustafa Çelebi [b.] Mehmed, Ahmed Çelebi b. Abdürrahim.