Rumeli Sadareti Mahkemesi 80 Numaralı Sicil (H. 1057-1059/M. 1647-1649) cilt: 15, sayfa: 112 Hüküm no: 95 Orijinal metin no: [24a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ölen İngiliz tüccarı Tomaro v. Bartley’in yahudi Ellez’e olan borcunun rehin bıraktığı mallardan satılarak ödenmesi Mahrûse-i Galata’da Bereketzâde mahallesinde sâkin iken hâlik olan Tomaro v. Bartley nâm müste’menin zimem-i nâsda olan hukūkunu ahz u kabza ve âhara olan düyûnunu edâya mahrûse-i mezbûrede nâibü’ş-şer‘ olan Cafer Efendi b. Bilal vasî nasb ve ta‘yîn edip vesâyeti kabûl eden Hüseyin Beşe b. Ali meclis-i şer‘-i hatîrde, mahmiye-i İstanbul’da Frenk mahallesinde sâkin olup Kiroz [Kadis] cemâ‘atinden Ellez v. Arslan nâm Yahudi tarafından husûs-ı âti’l-beyâna vekîl olup bi mâ hüve nehcü’s-sübût şer‘an sâbite olan li ebeveyn karındaşı İlya mahzarında bi’l-vesâye tav‘an ikrâr ve takrîr-i kelâm edip hâlik-i mezbûr Tomaro’nun terekesinden yüz zirâ‘ kırmızı florentin atlas ve yüz seksen zirâ‘ elvân-ı muhtelife frengî dârâyî ve üç Çerkesî sîm raht ve iki sîm dîvânî rahtı ve bir çift sîm üzengi müvekkil-i merkūm Ellez yedinde bin iki yüz elli dokuz riyâlî kuruş deyni mukābelesinde mezbûr Ellez’e rehin vaz‘ ve teslîm edip ol dahi irtihân ve tesellüm eyleyip mezbûr Tomaro hâlik oldukdan sonra mezkûr Ellez meblağ-ı mezkûru mezkûr Tomaro zimmetinde kendisinin hakkı idiğini ve eşyâ-i mezkûre dahi meblağ-ı mezkûre bin iki yüz elli dokuz riyâlî kuruş mukābelesinde rehn-i makbûz ile vekîli muvâcehemde beyyine-i âdile ile isbât edip mûcebince hükm-i şer‘î olundukdan sonra ben eşyâ-i mezkûre deyn-i mezkûr için mezkûr Ellez yedinden li ecli’l-bey‘ ahz edip sûk-ı sultânîde bey‘a arz ve müzâyede olunup gıbbe inkıtâ‘i’r-rağbe eşyâ-i mezkûre bin iki yüz elli riyâlî kuruşdan mezbûr Ellez üzerinde karâr edip ziyâde ile tâlib olmamağın, ben dahi vesâyetim hasebiyle mârrü’z-zikr yüz zirâ‘ florentin atlası ve yüz seksen zirâ‘ elvân-ı muhtelife frengî dârâyî ve üç Çerkesî sîm rahtı ve iki sîm dîvân tahtını ve bir çift sîm üzengiyi safka-i vâhide ile müvekkil-i mezbûra bin iki yüz elli dokuz riyâlî kuruşa bâtten bey‘ ve teslîm edip ol dahi iştirâ ve meclis-i akidde tesellüm eyledikden sonra semen-i merkūm bin iki yüz elli dokuz riyâlî kuruşu yine meclis-i akidde müvekkilim mezbûr yedinden ahz u kabz eyledikden sonra meblağ-ı mezbûru bi’l-vesâye deyn-i hâlik-i mezbûr için müvekkil-i mezbûr Ellez’e teslîm edip ol dahi ahz u kabz ve istîfâ eyledi dedikde, vasiyy-i mezbûru ikrâr-ı meşrûhunda vekîl-i merkūm vicâhen tasdîk ve şifâhen tahkīk edicek, mâ hüve’l-vâki‘ bi’t-taleb ketb olundu. Hurrire fi’l-yevmi’l-hâmis aşer min şehri Rebî‘ilevvel li sene tis‘a ve hamsîn ve elf. Şuhûdü’l-hâl: Sunullah Efendi b. Ebîbekir, İsmail Çelebi b. Yusuf, Ahmed Çelebi b. Abdurrahman, Mustafa Çelebi b. Mehmed.