Rumeli Sadareti Mahkemesi 80 Numaralı Sicil (H. 1057-1059/M. 1647-1649) cilt: 15, sayfa: 113 Hüküm no: 96 Orijinal metin no: [24b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mustafa Çelebi b. Mehmed’in Kerime bt. Abdullah aleyhine açtığı ev davasının reddi Mahmiye-i İstanbul’da Dîvâne Ali mahallesinde sâkin Mustafa Çelebi b. Mehmed b. Hasan meclis-i şer‘-i şerîfde, zikr-i âtî menzile vâzı‘atü’l-yed olduğu şer‘an sâbit olan işbu râfi‘atü’l-kitâb Kerime Hâtun bt. Abdullah mahzarında üzerine takrîr-i da‘vâ edip mahmiye-i mezbûrede Bayezid Ağa mahallesinde vâki‘ bir tarafı fahrü’l-muhadderât Sâime Hâtun bt. Abdullah mülküne ve bir tarafı Rahime Hâtun bt. Abdullah mülküne ve bir tarafı tarîk-i âmma müntehî büyût-ı müte‘addideyi ve bahçeyi müştemil cemî‘ menzil-i mezbûr müteveffâ-yı mezbûrun sulbî oğlu olan babam merkūm Mehmed’e intikāl edip ba‘dehû babam merkūm Mehmed dahi vefât etmeğin, ben sulbî oğlu ve vârisi olmağla cemî‘ menzil-i merkūm irs-i şer‘î ile bana intikāl eylemişken işbu Kerime Hâtun nâ-hak vaz‘-ı yed eder, suâl olunup menzil-i mezbûrdan âidiyesi kasr ve izâle olunması matlûbumdur dedikde, gıbbe’s-suâl merkūme Kerime Hâtun cevâbında, zikr olunan cemî‘ menzil-i mezbûru târih-i kitâbdan onsekiz sene mukaddem Aynî Hâtun bt. Musa bana yedi bin beş yüz râyic fi’l-vakt akçeye bâtten bey‘ ve teslîm ve kabz-ı semen-i mezkûr edip ben dahi nefsi[m] için iştirâ ve tesellüm eylediğimden sonra menzil-i merkūma mezbûr Mehmed’in muvâcehesinde bilâ-nizâ‘ on beş sene mâlikâne tasarruf edip işbu müdde‘î Mustafa Çelebi’nin babası merkūm Mehmed vefât edeli otuz gündür sinîn-i merkūmede müteveffâ-yı merkūm Mehmed’den da‘vâ sâdır olmayıp alâ sükût vefât etmişdir. Bu mikdâr zamân mürûr edip babası mezbûrdan da‘vâ sudûr etmemekle, işbu Mustafa Çelebi da‘vâ-yı meşrûhada mubtıldır dedikde, gıbbe’s-suâl mezbûr Mustafa Çelebi menzil-i mezbûr minvâl-i muharrer üzre babası müteveffâ-yı merkūm muvâcehesinde sinîn-i mezkûrede merkūme Kerime Hâtun’un mâlikâne tasarrufunu ve babasının sükût ve adem-i da‘vâsını tav‘an ikrâr etmeğin, mezbûr Mustafa Çelebi men‘ olunup mâ hüve’l-vâki‘ bi’t-taleb ketb olundu. Fi’l-yevmi’s-sânî min şehri Rebî‘ilâhir li sene tis‘a ve hamsîn ve elf. Şuhûdü’l-hâl: Ali b. Mustafa, Osman Çelebi b. Mehmed, Mustafa Çelebi b. Abdurrahman, Ahmed Çelebi b. Abdülbâkī.