Rumeli Sadareti Mahkemesi 80 Numaralı Sicil (H. 1057-1059/M. 1647-1649) cilt: 15, sayfa: 114 Hüküm no: 97 Orijinal metin no: [24b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hacı Hüseyin Bey b. Hacı Ali’nin menzilini Saraylı Belkıs bt. Abdullah’a sattığı Mahmiye-i İstanbul’da Aksaray’da Çakır Ağa mahallesinde sâkin Hacı Hüseyin Bey b. el-Hâc Ali meclis-i şer‘-i hatîr-i lâzımü’t-tevkīrde, Saraylı Belkıs Hâtun bt. Abdullah tarafından vech-i âtî üzre şirâya vekîl olup vekâleti bi mâ hüve nehcü’s-sübût şer‘an sâbite olan el-Hâc Ahmed Efendi b. el-merhûm ( ) mahzarında tav‘an ikrâr ve i‘tirâf edip zikri âtî akdin sudûruna değin yedimde ve taht-ı tasarrufumda mülk ve hakkım olup mahalle-i mezbûrede vâki‘ bir tarafı ba‘zan Şem‘î Hâtun bt. Abdullah mülküne ve ba‘zan Mümine Hâtun bt. Mehmed mülküne ve bir tarafı tarîk-i âmma bir tarafı meşrût-ı vakfa müntehî bir bâb fevkānî ve bir bâb tahtânî odaları ve bi’r-i mâî ve tahtapûşu ve kenîfi ve havluyu müştemil cemî‘ menzilimi, kâffe-i hukūk ve merâfıkı ile vekîl-i mezbûr Hacı Ahmed Efendi’ye elli dört bin fıddî-i cedîd râyic fi’l-vakt akçeye tarafeynden îcâb ve kabûlü hâvî bey‘-i bâtla bey‘ ve teslîm eyledim. Mezbûr Hacı Ahmed Efendi dahi minvâl-i meşrûh üzre müvekkilesi mezbûre Saraylı Belkıs Hâtun için iştirâ ve tesellüm eyleyip semeni olan meblağ-ı sâlifü’l-beyân elli dört bin akçeyi müvekkile-i mezbûre malından bana def‘ ü teslîm edip ben dahi tamâmen ahz u kabz ve istîfâ eyledim. Min ba‘d cemî‘ menzil-i mezbûr kâffe-i hukūkuyla müvekkile-i mezbûrenin mülk-i müşterâsı ve hakk-ı sırfıdır dedikde, mukırr-ı mezbûr Hacı Hüseyin Bey’in minvâl-i meşrûh üzre cârî ve sâdır olan ikrârını vekîl-i mezbûr Hacı Ahmed Efendi vicâhen tasdîk ve şifâhen tahkīk edicek, mâ hüve’l-vâki‘ bi’t-taleb ketb olundu. Fi’l-yevmi’s-sâbi‘ min şehri Rebî‘ilâhir li sene tis‘a ve hamsîn ve elf. Şuhûdü’l-hâl: Yusuf Efendi [b.] Kasım el-imâm, Osman Efendi b. Yahya el-imâm, Hacı Mehmed Ağa b. Abdurrahman el-korucu, Musa Çavuş b. Muharrem, Ali Beşe b. İsa, Mehmed Çelebi b. Hüseyin er-râcil, Mehmed Bey b. Yusuf el-cündî, Hacı Süleyman Bey b. Abdullah el-bevvâbü’s-Sultânî, İsmail Çelebi b. Hüseyin, Mehmed Halîfe b. İbrahim el-müezzin, Mehmed Halîfe b. Mustafa el-müezzin, Mehmed Çelebi b. ( ).