Rumeli Sadareti Mahkemesi 80 Numaralı Sicil (H. 1057-1059/M. 1647-1649) cilt: 15, sayfa: 129 Hüküm no: 121 Orijinal metin no: [29b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Saliha bt. Abdullah ve kocası Hüseyin Beşe b. Mahmud’un mülk menzillerini İsmail Ağa b. İskender’e sattıkları Havâss-ı Kostantıniyye kazâsına tâbi‘ Küçükçekmece nâhiyesinde Ankorya nâm karyede sâkine Saliha bt. Abdullah ve zevci Hüseyin Beşe b. Mahmud meclis-i şer‘-i hatîr-i lâzımü’t-tevkīrde, işbu râfi‘ül-kitâb İsmail Ağa b. İskender mahzarında her biri bi’t-tav‘i’s-sâf ikrâr ve i‘tirâf edip karye-i mezbûrede vâki‘ iki tarafı Ekşi Mustafa veresesi mülkleri ve iki tarafı tarîk-i âmma müntehî çiftlik ta‘bîr olunur cemî‘ mülk menzilimizi, cemî‘ tevâbi‘ ve levâhıkı ve kâffe-i hukūk ve merâfıkı ile ve yine karye-i mezbûrede vâki‘ bir tarafı Davud Ağa mülküne ve bir tarafı Bayram b. Hüdâverdi mülküne ve bir tarafı Ekşi Mustafa veresesi mülklerine ve bir tarafı tarîk-i âmma müntehî çiftlik ta‘bîr olunur cemî‘ mülk menzilimiz dahi cemî‘ tevâbi‘ ve levâhıkı ile bi safkatin vâhidetin merkūm İsmail Ağa’ya târih-i kitâbdan doksan gün tamâmına değin üç yüz on beş riyâlî kuruşa bi tarîki’l-bey‘ bi’l-vefâ bey‘ ve teslîm edip ol dahi vech-i muharrer üzre iştirâ ve kabûl eyledikden sonra semen-i mezbûr üç yüz on beş riyâlî kuruşu merkūm İsmail Ağa yedinden tamâmen ahz u kabz eyledik dediklerinde, mâ hüve’l-vâki‘ bi’t-taleb ketb olundu. Hurrire fi’l-yevmi’l-hâdî aşer min şehri Rebî‘ilâhir li sene 1059. Şuhûdü’l-hâl: Receb Ağa b. Mustafa, Derviş Ağa b. Bayram, Osman Ağa b. Memi, Ahmed Çelebi [b.] Karagöz.