Rumeli Sadareti Mahkemesi 80 Numaralı Sicil (H. 1057-1059/M. 1647-1649) cilt: 15, sayfa: 131 Hüküm no: 123 Orijinal metin no: [30b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Eski Van mutasarrıfı Şahbaz Paşa’nın kürk alımından dolayı kalan borcunun alacaklılarınca ertelendiği Sâbıkan Van Eyâleti’ne mutasarrıf olan düstûr-ı mükerrem müşîr-i müfahham Şahbaz b. Osman tarafından husûs-ı âti’l-beyânı ikrâra vekîl olup vekâleti Hasan Beşe b. Hüseyin ve Mustafa b. Gāzi el-müteferrika şehâdetleri ile şer‘an sâbite olan Mustafa Ağa b. İshak meclis-i şer‘-i hatîrde, mahmiye-i İstanbul’da Demirkapı’da sâkin Hasan Ağa b. Kasım ve kürkcü tâifesinden Petro v. Panoli ve İlya v. İsto mahzarlarında bi’l-vekâle ikrâr ve i‘tirâf edip müvekkilim mûmâ-ileyh Şahbaz Paşa zimmetinde merkūmûn Hasan Ağa ve Petro ve İlya yedlerinden müşterâ ve makbûz bir samurun semeninden iki bin beş yüz kıt‘a riyâlî kuruş deyni olup hâlâ müvekkil-i müşârun-ileyh meblağ-ı mezbûrdan bin kıt‘a riyâlî kuruşunu merkūmûna def‘ ve teslîm edip onlar dahi minvâl-i muharrer üzre yedinden ahz ve teslîm eylediklerinden sonra meblağ-ı bâkī bin beş yüz kıt‘a riyâlî kuruş müvekkilim müşârun-ileyh zimmetinde merkūmûn Hasan Ağa ve Petro ve İlya’ya lâzımü’l-edâ deyni kaldığından sonra merkūmûn Hasan Ağa ve Petro ve İlya meblağ-ı mezbûr bin beş yüz kıt‘a riyâlî kuruşu târih-i kitâbdan yüz elli gün tamâmına değin müvekkil-i mûmâ-ileyhe te’cîl eyledik dedikde, vekîl-i mezbûrun minvâl-i meşrûh üzre cârî ve sâdır olan ikrârını el-mukarru lehümü’l-merkūmûn vicâhen tasdîk ve şifâhen tahkīk edicek, mâ hüve’l-vâki‘ bi’t-taleb ketb olundu. Hurrire fi’l-yevmi’l-hâmis min şehri Rebî‘ilevvel li sene tis‘a ve hamsîn ve elf. Şuhûdü’l-hâl: Kıdvetü’l-emâcid Fettâh Ağa b. Mehmed serçavuşân, Mehmed Efendi b. Zülfikār el-müderris, Mısrî Mehmed Çavuş b. Abdullah, Yunus b. Ömer, Yahya b. Zekeriya.