Rumeli Sadareti Mahkemesi 80 Numaralı Sicil (H. 1057-1059/M. 1647-1649) cilt: 15, sayfa: 132 Hüküm no: 124 Orijinal metin no: [30b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ali Beşe b. Fuzûlî’nin Cemşid v. Pogoso’da alacağı olduğu Mahmiye-i İstanbul’da Muhtesib Karagöz mahallesinde sâkin işbu râfi‘ül-kitâb Ali Beşe b. Fuzûlî meclis-i şer‘-i hatîr-i lâzımü’t-tevkīrde, mahmiye-i mezbûrede Karagümrük kurbunda Sarmaşık mahallesinde sâkin Cemşid v. Pogoso nâm Ermeni muvâcehesinde üzerine takrîr-i da‘vâ edip merkūm Cemşid zimmetinde saman bahâsından ba‘de küllî hesâb dört bin iki yüz yirmi fıddî râyic fi’l-vakt akçe hakkı[m] olup bana edâda ta‘annüd eder, suâl olunup alıverilmesin taleb ederim dedikde, gıbbe’s-suâl merkūm Cemşid, fi’l-hakīka saman bahâsından ba‘de küllî hesâb işbu müdde‘î Ali Beşe’ye dört bin iki yüz cedîd akçe zimmetimde lâzımü’l-edâ ve vâcibü’l-kazâ deynim vardır deyû bi tav‘ihî ikrâr ve i‘tirâf etmeğin, ikrârı mûcebince meblağ-ı müdde‘â dört bin iki yüz akçenin müdde‘î-i merkūma edâsına mezbûr Cemşid üzerine ilzâm olunup mâ vaka‘a bi’t-taleb ketb olundu. Hurrire fi’l-yevmi’s-sâlis aşer min şehri Rebî‘ilevvel li sene tis‘a ve hamsîn ve elf. Şuhûdü’l-hâl: Yakub Efendi b. Pîr Mehmed el-kadı, Osman Çelebi b. Mehmed, Mustafa Çelebi b. Abdürrahim, İsmail Çelebi b. Yunus.