Rumeli Sadareti Mahkemesi 80 Numaralı Sicil (H. 1057-1059/M. 1647-1649) cilt: 15, sayfa: 132 Hüküm no: 125 Orijinal metin no: [30b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ahmed Ağa b. Şaban’ın mülk menzillerini rehin yoluyla Ali Hoca b. Ahmed’e sattığı Sâbıkan kapı ağası olup mahrûse-i Üsküdar’da Kefçe mahallesinde sâkin iftihârü’l-ekâbir ve’l-a‘yân Ahmed Ağa b. Şaban tarafından kethüdâsı ve husûs-ı âti’l-beyâna vekîli olup vekâleti Mustafa Efendi b. Şaban el-kâtib ve Abdünnebi Beşe b. Ramazan şehâdetleri ile şer‘an sâbite olan Hasan Ağa b. Nurullah meclis-i şer‘-i hatîrde, hâssa bostancılar kethüdâsının eskisi olan umdetü’l-emâcid ve’l-ekârim Ali Hoca b. Ahmed mahzarında bi’l-vekâle tav‘an ikrâr ve i‘tirâf edip zikri âtî bey‘in sudûruna değin müvekkilim müşârun-ileyhin silk-i mülk ve yedinde münselik olup mahalle-i mezbûrede vâki‘ bir tarafı Halil Bey b. İbrahim mülküne ve bir tarafı diğer Halil Bey b. Abdullah mülküne ve bir tarafı Sarayî nâm hâtun mülküne ve bir tarafı tarîk-i âmma müntehî cemî‘ mülk menzilini, cemî‘ tevâbi‘ ve levâhıkı ile ve yine mahrûse-i mezbûrede Hasan Paşa mahallesinde vâki‘ bir tarafı Ahmed b. Abdülkerim mülküne ve bir tarafı ba‘zan Hatice Sultan bağına ve ba‘zan Nasuh b. Abdullah mülküne ve ba‘zan Mehmed ve Hatice ve Hamide Hâtun evlâd-ı Mustafa mülklerine ve iki tarafı tarîk-i âmma müntehî cemî‘ mülk menzilini dahi cemî‘ tevâbi‘ ve levâhıkı ile mûmâ-ileyh Ali Hoca’ya safka-i vâhide ile dört bin altı yüz kıt‘a riyâlî kuruşa târih-i kitâbdan altı ay tamâmına değin bi tarîki’l-bey‘ bi’l-vefâ bey‘ ve teslîm edip ol dahi vech-i muharrer üzre iştirâ ve tesellüm ve kabûl eyledikden sonra müvekkilim mûmâ-ileyh semen-i mezbûr dört bin altı yüz kıt‘a riyâlî kuruşu mûmâ-ileyh Ali Hoca yedinden ahz u kabz eyledi dedikde, vekîl-i mezbûru ikrâr-ı meşrûhunda el-mukarru lehü’l-merkūm vicâhen tasdîk ve şifâhen tahkīk eyledikden sonra vekîl-i mezbûr mûmâ-ileyh Ali Hoca mahzarında i‘âde-i kelâm edip bey‘-i mezkûr hakīkatde rehin olmakla, müvekkil-i mezbûr ecel-i merkūm hulûlünde semen-i mezbûru edâ ve îfâya adem-i kudreti olıcak menzileyn-i mezbûreyni âhara bey‘a ve semenlerini kabza mûmâ-ileyh Ali Hoca’yı tarafından azl ve in‘izâlden masûne vekâlet-i devriye ile vekîl eyledi dedikde, müşârun-ileyh Ali Hoca dahi minvâl-i meşrûh üzre vekâlet-i mezbûreyi kabûl ve hizmet-i lâzımesini edâya müte‘ahhid olmağın, mâ vaka‘a bi’t-taleb ketb olundu. Hurrire fi’l-yevmi’l-hâdî aşer min şehri Rebî‘ilâhir li sene 1059. Şuhûdü’l-hâl: Ahmed Bey b. ( ), Rıdvan Ağa, Hızır b. Receb, Mustafa b. Abdürrahim.