Rumeli Sadareti Mahkemesi 80 Numaralı Sicil (H. 1057-1059/M. 1647-1649) cilt: 15, sayfa: 139 Hüküm no: 134 Orijinal metin no: [32b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ömer Bey b. Mehmed’in alacaklı olduğu Teke Mütesellimi Hasan Çavuş ile sulhu Vilâyet-i Anadolu’da vâki‘ Gedüs nâm kasaba ahâlîsinden Ömer Bey b. Mehmed meclis-i şer‘-i hatîr-i lâzımü’t-tevkīrde, Malkoç Çavuş etbâ‘ından Hasan Çavuş b. ( ) tarafından sulh-ı âti’l-beyâna vekîl olup vekâleti bi mâ hüve nehcü’s-sübût şer‘an sâbite olan işbu sâhibü’l-kitâb Ramazan Beşe b. Yusuf mahzarında tav‘an ikrâr ve i‘tirâf edip mezbûr Hasan Çavuş Teke mütesellimi olduğu hâlde yedimden nâ-hak altmış iki riyâlî kuruşumu ahz eyleyip hâlâ zafer bulduğumda da‘vâ etmekle beynimizde münâza‘ât-ı kesîre ve muhâsamât-ı ekîde vâki‘ olmuşdu. El-hâletü hâzihî muslihûn tavassut edip meblağ-ı mezbûr da‘vâsından beni işbu sulha vekîl olan mezbûr Ramazan Beşe ile on iki kıt‘a riyâlî kuruş üzerine inşâ-i akd-i sulh eylediklerinde, ben dahi sulh-ı mezbûru kabûl ve bedel-i sulh olan meblağ-ı mezbûr on iki riyâlî kuruşu merkūm Ramazan Beşe yedinden tamâmen ahz u kabz eyleyip meblağ-ı müdde‘â altmış iki riyâlî kuruş da‘vâsından mezbûr Hasan Çavuş’un zimmetini ibrâ ve iskāt eyledim dedikde, mukırr-ı mezbûrun vech-i meşrûh üzre cârî ve sâdır olan ikrârını el-mukarru [lehü’l]-mezbûr Ramazan Beşe vicâhen tasdîk ve şifâhen tahkīk [edicek], mâ hüve’l-vâki‘ bi’t-taleb ketb olundu. Tahrîren fi’l-yevmi’s-sâlis aşer min şehri Rebî‘ilâhir li sene tis‘a ve hamsîn ve elf. Şuhûdü’l-hâl: Mehmed Çavuş b. Resûl, Veliyyüddin Efendi b. Ramazan, Ahmed Efendi b. Abdülbâkī Efendi, Mustafa Efendi b. Abdurrahman Efendi.