Rumeli Sadareti Mahkemesi 80 Numaralı Sicil (H. 1057-1059/M. 1647-1649) cilt: 15, sayfa: 140 Hüküm no: 135 Orijinal metin no: [32b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ali Ağa b. Mehmed’in Bekçi Mehmed b. Yusuf’dan alacağı olduğu İşbu sâhibü’l-kitâb Ali Ağa b. Mehmed nâm kimesne meclis-i şer‘-i hatîr-i lâzımü’t-tevkīrde, mahrûse-i Galata muzâfâtından kasaba-i Kasımpaşa’da Câmi‘-i Kebîr mahallesinde Bekçi Mehmed b. Yusuf mahzarında üzerine takrîr-i da‘vâ edip bundan akdem mezbûr Mehmed’e üç yüz riyâlî kuruş fâide yarıya mudârebe ile verip, ol dahi ahz u kabz eyledikden sonra ben sefer edip fâidesinden hâsıl olanın nısfını bana teslîm edip ba‘dehû Karadeniz’e sefer eyledikde bir sefînenin nısfını iştirâ eyledikde, mâl-ı mudârebe olan meblağ-ı mezbûr[ü’n-]na‘t üç yüz riyâlî kuruşu sefîne-i mezbûre için bâyi‘ine teslîm eylemekle istihlâk eylemişdir, hâlâ taleb ederim dedikde, gıbbe’s-suâl mezbûr Mehmed ba‘de’l-mudârebe ve teslîmü’l-fâ’ide sefer-i âharda meblağ-ı mezkûr üç yüz riyâlî kuruş ile nısfına iştirâ eyledim ve sefîne dahi gark oldu ve ba‘de iştirâ’i’s-sefîne bin sekiz yüz akçe teslîm eyledim dedikde, gıbbe’l-istintâk meblağ-ı mezbûr bin sekiz yüz akçeyi ba‘de iştirâ Mehmed yedinden ahz eylediğini müdde‘î-i mezbûr Ali Ağa ikrâr eyledikden sonra meblağ-ı müdde‘â üç yüz riyâlî kuruşu mezbûr Ali Ağa’ya edâ ve teslîme mezbûr Mehmed üzerine hükm olundukdan sonra mezbûr Ali Ağa’ya dahi ahz eylediği meblağ-ı mezbûr bin sekiz yüz akçeyi mezbûr Mehmed’e red ü teslîme emr-i şer‘î olunup mâ hüve’l-vâki‘ bi’t-taleb ketb olundu. Fi’l-yevmi’t-tâsi‘ min şehri Rebî‘ilâhir li sene tis‘a ve hamsîn ve elf. Şuhûdü’l-hâl: Sunullah Bey b. Numan, Mehmed Beşe b. Mustafa seroda, Mehmed Efendi b. Ömer, el-Hâc Şaban b. Mehmed, el-Hâc Hamza b. el-Hâc Şaban, Yahya Bey b. Zekeriya.