Rumeli Sadareti Mahkemesi 80 Numaralı Sicil (H. 1057-1059/M. 1647-1649) cilt: 15, sayfa: 144 Hüküm no: 142 Orijinal metin no: [34a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Timar sahipleri Mustafa ve Hasan’ın yaşları küçük olması sebebiyle yerlerine cebelü bedeli olarak iki kişinin kiralandığı Vilâyet-i [Rum]eli’nde kasaba-i Rusçuk sükkânından olup Çonalic kazâ[sında] vâki‘ Sonot? nâm karye ve gayrıdan altı bin üç yüz dokuz akçe yazar tîmara ale’l-iştirâk mutasarrıflar olan Mustafa Bey ve Hasan Bey ibney Mehmed Sipâhi nâm sagīrlerin bu husûsa hâkim-i muvakki‘-i sadr-ı kitâb tûbâ-lehû ve hüsnü me’âb nasbı ile vasîleri olan Feridun Çavuş b. Abdullah meclis-i şer‘-i şerîfde bi’l-vesâye takrîr-i kelâm edip mezbûrân Mustafa Bey ve Hasan Bey sagīrler olup nefsühumâ sefere eşmeğe kudretleri olmamağla, yerlerine bir cebelü bedel verilmek üzre fermân-ı âlî sâdır olmağın, ben dahi vesâyetim hasebi ile sagīrân-ı mezbûrânın yerlerine işbu mübârek senede vâki‘ sefer-i hümâyûna eşmek üzre târih-i kitâbdan bir sene tamâmına değin merkūm Mi‘mâr Ahmed’in nefsini altı bin iki yüz cedîd râyic fi’l-vakt akçeye istîcâr edip ve merkūm Mehmed’in nefsini dahi dört bin altı yüz cedîd akçeye istîcâr edip onlar dahi minvâl-i muharrer üzre nefislerini îcâr eylediklerinden sonra ber vech-i peşîn mezbûr Mi‘mâr Ahmed’e altı bin iki yüz akçe ücretini ve merkūm Mehmed’e dahi dört bin altı yüz akçe ücretini teslîm eyledim. Onlar dahi yedimden bi’t-tamâm alıp kabz eylediler dedikde, vasiyy-i mezbûru vech-i muharrer üzre cârî olan ikrârında mezbûrân Mi‘mâr Ahmed ve Mehmed vicâhen tasdîk ve şifâhen tahkīk edicek, mâ hüve’l-vâki‘ bi’t-taleb ketb olundu. Sene 1059. Şuhûdü’l-hâl: Fahrü’l-akrân Mehmed Ağa, Laleli Mustafa Çelebi, Durmuş Beşe b. Ramazan, Hüseyin b. Mustafa.