Rumeli Sadareti Mahkemesi 80 Numaralı Sicil (H. 1057-1059/M. 1647-1649) cilt: 15, sayfa: 148 Hüküm no: 149 Orijinal metin no: [35a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ayşe bt. Sefer ile Hacı Mehmed b. Cabir’in muhâlaa yoluyla boşandığı Mahmiye-i İstanbul’da Emin Bey mahallesi sâkinelerinden Ayşe bt. Sefer tarafından hul‘-ı âti’l-beyânı ikrâra vekîl olup vekâleti el-Hâc Ali b. Pîr Ahmed ve Mustafa b. Abdullah şehâdetleri ile şer‘an sâbite olan Mehmed Bey b. Resûl meclis-i şer‘-i hatîr-i lâzımü’t-tevkīrde, müvekkile-i mezbûrenin zevc-i gayr-ı dâhilün-bihâsı işbu sâhibü’l-kitâb el-Hâc Mehmed b. Cabir mahzarında bi’l-vekâle ikrâr edip müvekkile-i mezbûre Ayşe mezbûr el-Hâc Mehmed ile nikâhı ma‘kūd olup mezbûr el-Hâc Mehmed zimmetinde olan iki bin cedîd râyic fi’l-vakt akçe mehr-i müeccelinden müstahıkka olduğu nısfı bin akçe üzerine ve mehr-i mu‘accel olup müvekkile-i mezbûreye teslîm olunan mezbûrü’n-na‘t iki bin cedîd akçeden müstahıkka olduğu bin akçeden iki yüz akçesi üzerine tav‘an muhâla‘a-i sahîha-i şer‘iyye ile muhâla‘a edip mezbûr el-Hâc Mehmed dahi minvâl-i meşrûh [üzre] muhâla‘a oldukdan sonra müvekkile-i mezbûre Ayşe bedel-i hul‘-ı mezbûr iki yüz akçe ile ve mu‘accel-i mezkûrdan müstahıkka olmadığı bin akçeyi cem‘an bin iki yüz akçeyi merkūm el-Hâc Ahmed’e def‘ ü teslîm edip ol dahi tamâmen ahz u kabz eyledikden sonra her biri zevciyyete müte‘allika âmme-i da‘vâdan âhar zimmetini ibrâ-i âmm-ı kātı‘ü’n-nizâ‘la ibrâ ve iskāt eyledi dedikde, mezbûr Mehmed Bey’in vech-i meşrûh üzre bi’l-vekâle cârî ve sâdır olan ikrârını mezbûr el-Hâc [Mehmed] bi’l-muvâcehe tasdîk ve bi’l-müşâfehe tahkīk edicek, mâ hüve’l-vâki‘ bi’t-taleb ketb olundu. Hurrire fi’l-yevmi’l-âşir min şehri Rebî‘ilâhir li sene tis‘a ve hamsîn ve elf. Şuhûdü’l-hâl: El-Hâc Mansur b. Mustafa, Osman Çelebi [b.] es-Seyyid ( ) kâtib-i ahkâm, el-Hâc Mehmed b. Veli, Sefer b. Abdullah, Yahya b. Zekeriya.