Rumeli Sadareti Mahkemesi 80 Numaralı Sicil (H. 1057-1059/M. 1647-1649) cilt: 15, sayfa: 149 Hüküm no: 150 Orijinal metin no: [35a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. David v. Mosi’nin Mehmed Efendi b. Ayas tarafından Sultan İbrahim için yapılacak mücevherli araba için alınan zümrüt ve yakutunun iadesi Husûs-ı âti’l-beyânın mahallinde tahrîri için bi’t-taleb savb-ı şer‘den irsâl olunan Mevlânâ Sunullah Efendi b. Ebîbekir mahmiye-i İstanbul’da Emin Nureddin mahallesinde vâki‘ rükn-i âlîşân sadr-ı âsaf-nişân vezîr-i a‘zam müşîr-i efham Mehmed Paşa hazretlerinin sarayına varıp beyne’l-ekâbir ve’l-e‘âlî akd-i meclis-i şer‘ eyledikde, Çiçilye cemâ‘atinden David v. Mosi nâm Yahudi meclis-i merkūmda Mehmed Efendi b. Ayas mahzarında takrîr-i kelâm edip vezîr-i a‘zam iken katl olunan Ahmed Paşa b. Mehmed Ağa vezâretinde merhûm ve mağfûrun-leh Sultan İbrahim Hân için bâ-fermân-ı âlî cevherî araba yapılmasına merkūm Mehmed Efendi mu‘temed olmakla, yedimde mülküm olan seksen aded zümrüd ve yâkutum yüz kıt‘a riyâlî kuruşa mezbûr Mehmed Efendi mübâşeret ve yediyle alâ sevmi’ş-şirâ ahz u kabz olunmağın, meblağ-ı mezbûru merkūm Mehmed Efendi’den mübâşereti hasebiyle taleb eylediğimde, merkūm Mehmed Efendi hayâtında sûm-i şirâ vechi üzre olan bey‘ akd-i tâm olmayıp verdiğin eşyâ-i mezkûre mevcûde olmağla ahz eylediğin kuruşu bana teslîm edip verdiğin eşyâ-i mezkûreyi alıveresin demekle, ben dahi verdiğim eşyâ-i mezkûre bana red ü teslîm olunması makbûlümdür dedikde, gıbbe’s-suâl mezbûr Mehmed Efendi kaziyye vech-i meşrûh üzre olmuşdur deyicek, merkūm Mehmed Efendi’ye eşyâ-i mezbûreyi red ü teslîme tenbîh olundukdan sonra vâki‘-i hâli mevlânâ-yı mezbûr mahallinde ketb ü tahrîr, ba‘dehû meclis-i şer‘a gelip alâ vukū‘ihî ihbâr ve takrîr etmeğin, mâ vaka‘a bi’t-taleb ketb olundu. Fi’l-yevmi’l-hâdî ve’l-ışrîn min Saferi’l-hayr li sene 1059. Şuhûdü’l-hâl: Kıdvetü’l-ekârim ve’l-e‘âlî Turnacı Hüseyin Efendi b. İskender, Başmuhâsebeci Ali Efendi b. Mehmed, Telhîsî Hasan Ağa, Hazînedâr Ali Ağa, Receb Beşe b. Abdullah kuyumcubaşı, el-Hâc Süleyman b. İskender, İsa b. Ahmed.