Rumeli Sadareti Mahkemesi 80 Numaralı Sicil (H. 1057-1059/M. 1647-1649) cilt: 15, sayfa: 151 Hüküm no: 152 Orijinal metin no: [35b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Haffâf Kaya b. Müslüman’ın Beytülmâl Emini İlyas Ağa bin Sinan aleyhindeki alacak davasında sulh olduğu Büyükdereli demekle ma‘rûf olup Dergâh-ı âlî dâme mahfûfen bi’l-me‘âlî Yeniçerilerinin on beşinci cemâ‘atinden olup medîne-i Kefe’de vefât eden Oğlan Mehmed Beşe b. Şaban’ın verâseti li ebeveyn ammi oğlu olup Sinop ahâlîsinden Haffâf Kaya b. Müslüman meclis-i şer‘-i hatîr-i lâzımü’t-tevkīrde müteveffâ-yı mezbûrdan zâhirde vâris-i ma‘rûfu olmak zu‘muyla terekesine bi’l-emâne vaz‘-ı yed edip bi’l-fi‘l Beytülmâl-ı râcilîn emîni olan İlyas Ağa b. Sinan tarafından delîl olup vekâleti bimâ hüve nehci’s-sübût şer‘an sâbit olan Mehmed Beşe b. Mustafa mahzarında tav‘an ikrâr ve i‘tirâf edip mûrisim müteveffâ-yı mezbûrun cemî‘ terekesini emîn-i mezbûr ahz u kabz ve mesârifine sarfla istihlâk eyledikden sonra ben dahî işbu vekîl-i mezbûr Mehmed Beşe’nin müvekkili mezkûr İlyas Ağa’dan taleb ve da‘vâ eylediğimde beynimizde <> münâza‘ât-ı kesîre vâkı‘a [36a] olmuşidi. El-hâletü hâzihî beynimizde muslihûn tavassut edip tereke-i müteveffâ-yı mezbûrdan beni kırk bin fıddî râyic fi’l-vakt akçe üzerine inşâ-i akd-i sulh eylediklerinde ben dahi sulh-ı mezbûru kabûl ve bedel-i sulh olan meblağ-ı mezkûr kırk bin cedîd akçeyi meclis-i sulhda müvekkil-i mezbûr İlyas Ağa yedinden tamâmen ahz u kabz edip, mûrisim müteveffâ-yı mezbûrun terekesine müte‘allika âmme-i da‘vâdan emîn-i mezbûrun zimmetini ibrâ ve iskāt eyledim dedikde, gıbbe’t-tasdîk mâ vaka‘a bi’t-taleb ketb olundu. Fi’l-yevmi’s-sâdis min Cumâdelâhir li sene tis‘a ve hamsîn ve elf. Şuhûdü’l-hâl: Abdullah Efendi b. Yusuf el-imâm, Ahmed Çelebi b. Receb, Mehmed Beşe b. Zülfikār, Mehmed Çelebi b. Ahmed, İbrahim Çelebi b. Mustafa, Mahmud Çelebi b. Emrullah, Ali Çelebi b. İsa.