Rumeli Sadareti Mahkemesi 80 Numaralı Sicil (H. 1057-1059/M. 1647-1649) cilt: 15, sayfa: 152 Hüküm no: 153 Orijinal metin no: [36a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ahmed ve Mehmed b. Hacı Mustafa’nın, Fâtıma Hâtun Vakfı’ndan almış oldukları borç karşılığında bağlarını rehin vermeleri Medîne-i İznikmid kazâsına [tâbi‘] Değirmenderesi nâ[m] karye sükkânından Ahmed ve Mehmed ibney el-Hâc Mustafa nâm kimesneler meclis-i şer‘-i hatîr-i lâzımü’t-tevkīrde mahmiye-i İstanbul’da Nişancı Paşa-yı Atîk mahallesinde Fâtıma Hâtun Vakfı’na berât-ı şerîf ile mütevellî olan Mehmed Çelebi b. İsmail mahzarında her biri tav‘an ikrâr ve takrîr-i kelâm edip vakf-ı mezbûra ale’l-iştiraki’s-seviyy cihet-i karz-ı şer‘îden altmış beş bin cedîd râyic fi’l-vakt akçe zimmetimizde vâcibü’l-edâ ve lâzımü’l-kazâ deynimiz olduğundan gayrı vakf-ı mezbûr malından mütevellî-i mezbûr yedinden müşterâ ve makbûzumuz olup târih-i kitâbdan bir sene tamâmına değin müeccel, ma‘lûmü’l-levn ve’l-cins ve’l-mikdâr çuka bahâsından dahi sekiz bin akçe cem‘an yetmiş üç bin cedîd akçe vech-i muharrer üzre zimmetimizde edâsı vâcib deynimiz olup meblağ-ı mezbûr yetmiş üç bin akçe mukābelesinde ale’l-iştirâki’s-seviyy yedimizde mülkümüz ve hakkımız olup karye-i mezbûrede vâki‘ bir tarafı İshak Çelebi b. Ali Beşe mülküne ve bir tarafı el-Hâc Mehmed b. Ali mülküne ve bir tarafı ba‘zan Mehmed Reis ve ba‘zan el-Hâc Mehmed mülklerine ve bir tarafı ba‘zan merhûm Ali Bey b. Nasuh Paşa veresesi ve ba‘zan Berber Resûl mülklerine müntehî bir kıt‘a cemî‘ bağımızı cemî‘ hukūkuyla mütevellî-i merkūm Mehmed Çelebi’nin yedine rehin vaz‘ [ve] teslîm eyledik. Ol dahi irtihân ve tesellüm eyledikde, gıbbe’t-tasdîki’ş-şer‘î mukırrân-ı mezbûrân Ahmed ve Mehmed’in babaları merkūm el-Hâc Mustafa meblağ-ı mezbûr yetmiş üç bin cedîd akçeye tarafeynden emr ve kabûlü hâviye kefâletle kefîl olmağın mâ vaka‘a bi’t-taleb ketb olundu. Fi’l-yevmi’s-sâlis aşer min şehri Rebî‘ulâhir li sene tis‘a ve hamsîn ve elf. Şuhûdü’l-hâl: Ahmed Çelebi b. Mustafa, Mustafa Çelebi b. Ahmed, Musa Dede b. Ahmed, Emrullah Çelebi b. Derviş, Sefer b. Abdullah, Seyyid Hüseyin b. Musa, Ahmed b. Musa, Musa Dede b. Abdullah.