Rumeli Sadareti Mahkemesi 80 Numaralı Sicil (H. 1057-1059/M. 1647-1649) cilt: 15, sayfa: 152 Hüküm no: 154 Orijinal metin no: [36a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yusuf Beşe b. Ali’nin Ahmed Ağa Vakfı’na olan borcu karşılığında evini rehin vermesi Husûs-ı âti’l-beyânın mahallinde tahrîr için bi’t-taleb savb-ı şer‘den irsâl olunan Mevlânâ Sunullah Efendi b. Ebûbekir mahmiye-i İstanbul’da Emin Nureddin mahallesinde vâki‘ merhûm Kazgancızâde Ahmed Ağa’nın sulbî oğlu olan Mehmed Ağa’nın menziline varıp huzûr-ı müslimînde akd-i meclis eyledikde, mahmiye-i mesfûrede Hoca Gıyaseddin mahallesinde sâkin Yusuf Beşe b. Ali nâm râcil meclis-i ma‘kūd-ı mezbûrda merhûm-ı mezbûr Ahmed Ağa’nın Vakfı’na meşrûtiyyet üzre bi’l-fi‘l mütevellî olan sulbî kebîr oğlu Abdülbâkī Çelebi mahzarında tav‘an ikrâr ve i‘tirâf edip vakf-ı mezbûra cihet-i karz-ı şer‘îden iki bin üç yüz riyâlî kuruş deynim olduğundan gayrı semeni târih-i kitâbdan yüz seksen gün tamâmına değin müeccel vakf-ı mezbûr malından mütevellî-i mezbûr yedinden müşterâ ve makbûzum olan ma‘lûmü’l-levn ve’l-mikdâr ve’l-cins çuka bahâsından yüz yetmiş iki riyâlî kuruş vâcibü’l-edâ ve lâzımü’l-kazâ deynim olup meblağ-ı mezbûr iki bin dört yüz yetmiş iki riyâlî kuruş mukābelesinde silk-i mülkümde münselik ve yedimde hakkım olup zikr olunan Hoca Gıyaseddin mahallesinde vâki‘ bir tarafı Hasan Efendi el-kadı mülküne ve bir tarafı Muhsine Hâtun mülküne ve bir tarafı tarîk-i âmma ve bir tarafı tarîk-i hâssa müntehî cemî‘ menzilimi ba‘de’t-tahliyeti’ş-şer‘iyye mütevellî-i mezbûr Abdülbâkī’nin yedine rehin vaz‘ eyledim. Ol dahi minvâl-i muharrer üzre irtihân ve teslîm eyledim dedikde, mütevellî-i merkūm Abdülbâkī Çelebi mukırr-ı mezbûr Yusuf Beşe’nin cârî ve sâdır olan ikrâr-ı meşrûhunu vicâhen tasdîk ve şifâhen tahkīk eyledikden sonra zikr olunan Hoca Gıyaseddin mahallesinde sâkin Süleyman Çelebi b. Abdülganî nâm kimesne meblağ-ı mezbûr iki bin dört yüz yetmiş iki riyâlî kuruşa tarafeynden emir ve kabûlü hâviye kefâletiyle kefîl olmağın vâki‘-i hâli Mevlânâ-yı mezbûr mahallinde ketb ve tahrîr ve ba‘dehû meclis-i şer‘a gelip alâ vukū‘ihî ihbâr ve takrîr edicek, mâ hüve’l-vâki‘ bi’t-taleb ketb olundu. Fi’l-yevmi’r-râbi‘ aşer min şehr-i Rebî‘ulâhir li sene tis‘a ve hamsîn ve elf. Şuhûdü’l-hâl: Ömer Çavuş b. Mehmed, İbrahim Beşe b. Derviş, Gazanfer bin Mustafa, Mehmed Odabaşı, Yusuf b. Abdullah, Mehmed Odabaşı ve gayruhüm.