Rumeli Sadareti Mahkemesi 80 Numaralı Sicil (H. 1057-1059/M. 1647-1649) cilt: 15, sayfa: 153 Hüküm no: 155 Orijinal metin no: [36b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Havva bt. Mehmed’in eşi Hasan Bey b. Ali’den muhâlaa yoluyla boşandığı Mahmiye-i İstanbul’da Sofular mahallesinde sâkine Havva Hâtun bt. Mehmed meclis-i şer‘-i hatîr-i lâzımü’t-tevkīrde zevc-i gayr-ı dâhil-i bihâsı işbu râfi‘ül-kitâb Hasan Bey b. Ali mahzarında bi tav‘ihâ ikrâr ve i‘tirâf edip zevcem merkūm Hasan Bey zimmetinde nikâh-ı ma‘kūd olan yüz kıt‘a riyâlî kuruşun müstahakka olduğum nısfı elli kıt‘a riyâlî kuruş üzerine karz ve takdîr ettirdiğim yevmî yirmi akçeden on üç ayda müstahakkım olan cem‘an yedi bin sekiz yüz fıddî râyic fi’l-vakt akçe nafaka-i mefrûzam üzerine zevcim merkūm Hasan Bey ile muhâla‘a-i sahîha-i şer‘iyye ile muhâla‘a eyledim dedikde, merkūm Hasan Bey dahi minvâl-i muharrer üzre hul‘-ı mezbûru kabûl-i muhâla‘a eyledikden sonra târih-i kitâba gelince zevciyyete müte‘allika ve sâyir hukūk-ı mechûl [ve] ma‘lûm ve hukūk-ı mechûlün-bihe müte‘alli[k]a âmme-i da‘vâdan her birimiz âharın zimmetini ibrâ-i âmm-ı kātı‘ü’n-nizâ‘la ibrâ ve iskāt etmeğin, mâ hüve’l-vâki‘ bi’t-taleb ketb olundu. Hurrire fi’l-yevmi’s-sâdis aşer min şehri Rebî‘ulâhir li sene tis‘a ve hamsîn ve elf. Şuhûdü’l-hâl: İsmail Ağa b. İbrahim Bey, Mehmed Bey b. Ahmed Bey, Mehmed Bey el-bevvâbü’s-sultânî, Süleyman Bey b. Ahmed, Nimetullah b. Ali Bey, Mehmed Beşe b. Mahmud, Sefer Beşe b. Abdullah, Yahya Bey b. Zekeriya.