Rumeli Sadareti Mahkemesi 80 Numaralı Sicil (H. 1057-1059/M. 1647-1649) cilt: 15, sayfa: 154 Hüküm no: 157 Orijinal metin no: [36b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mısır askerinden Mehmed Bey’in Nevcivan bt. Abdullah’ın bazı eşyalarını çaldığı gerekçesiyle açılan davada, anlaşma sağladığı Mahrûse-i Mısır askerinden işbu Mehmed Bey b. Mustafa el-cündî meclis-i şer‘-i hatîr-i lâzımü’t-tevkīrde mahmiye-i İstanbul’da Sarı Bayezid mahallesinde sâkine işbu sâhib hâze’l-vesîka Nevcivân bt. Abdullah mahzarında tav‘an ikrâr ve i‘tirâf edip mahalle-i mezbûrede ben sefer-i ikāmet ile sâkin olduğum menziline muttasıl menzilde mezbûre Nevcivân sâkine iken benim sâkin olduğum menzile muttasıl olan dolabından yüz yirmi beş riyâlî kuruşum ve bir sîm kemer raht kuşağım ve üç değirmî kilâbdân saçaklı altı makramam ve üç dülbend yaşmak ve bir dülbend baş makramam ve üç değirmî âl püsküllü yağlık ve bir top mâî miskāli bogasim ve bir beyaz Musul bogasim ve bir zenâne don ve iki kilâbdân püsküllü serpûş sirkat eyledin deyû benim üzerime da‘vâ eyledikde ahz eyleyip ben dahi inkâr etmemle beynimizde münâza‘ât-ı kesîre vâkı‘a oldukda mezbûre Nevcivân benim ile an inkâr yüz yirmi beş riyâlî kuruş üzerine sulh olup bedel-i sulhu yedimden ahz u kabz eylemişdi. Bedel-i sulh olan meblağ-ı mezbûra müte‘allik merkūme Nevcivân üzerine bi vechin mine’l-vücûh da‘vâm yokdur dedikde, mukırr-ı mezbûru ikrâr-ı meşrûhunda el-mukırru lehâ’l-mezbûre vicâhen tasdîk ve şifâhen tahkīk edicek, mâ hüve’l-vâki‘ bi’t-taleb ketb olundu. Tahrîren fi’l-yevmi’r-râbi‘ aşer min şehri Rebî‘ulâhir li sene tis‘a ve hamsîn ve elf. Şuhûdü’l-hâl: Yusuf b. Abdullah, Yahya Bey b. Zekeriya, Ahmed Çelebi b. Abdurrahman, Ali Çelebi b. Ali, Abdurrahman el-imâm, Musa Çelebi el-müezzin.