Rumeli Sadareti Mahkemesi 80 Numaralı Sicil (H. 1057-1059/M. 1647-1649) cilt: 15, sayfa: 158 Hüküm no: 160 Orijinal metin no: [38a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Moralı Yako v. Avraham’ın, mücevherci Yako v. Avraham’da olan alacağının tahsil edilmesi Mahmiye-i İstanbul’da Mahmudpaşa Çarşısı’nda sâkin olup Misine cemâ‘atinden işbu râfi‘ü’l-vesîka Moralı Yako v. A[v]raham nâm Yahudi meclis-i şer‘-i hatîrde mahmiye-i mezbûrede Frenk mahallesinde sâkin olup Sinori cemâ‘atinden Cevâhirci Yako v. Avraham nâm Yahudi mahzarında üzerine takrîr-i da‘vâ edip mezbûr Yako’ya silk-i mülkümde münselik beş bin riyâlî kuruş kıymetli bir cevâhir kuşağımı yine beş bin riyâlî kuruşa bâtten bey‘ ve teslîm edip ol dahi minvâl-i muharrer üzre iştirâ ve tesellüm ve kabûl, âhara bey‘le istihlâk eyledikden sonra kıymet-i mezbûrdan işbu Yako bana iki bin kıt‘a riyâlî kuruşunu def‘ ve teslîm edip ben dahi minvâl-i muharrer üzre yedinden ahz ve teslîm edip meblağ-ı bâkī iki [bin] dokuz yüz elli kıt‘a riyâlî kuruş hakkım ile’l-ân merkūm Yako zimmetinde kalmışdır. Hâlâ bana edâdan imtinâ‘ eder. suâl olunup alıverilmesin taleb ederim dedikde, gıbbe’s-suâl merkūm Yako cevâbında fi’l-hakīka işbu müdde‘î Yako’nun beş bin kıt‘a riyâlî kuruş kıymetli bir cevâhir kuşağını yine beş bin kıt‘a riyâlî kuruşa bundan akdem Vezîr-i a‘zam iken maktûlen vefât eden Salih Paşa için hâl-i vezâretinde müdde‘î-i merkūm Yako’dan bâtten iştirâ ve tesellüm ba‘dehû vezîr-i mûmâ-ileyhe bey‘ ve teslîm edip bâkī iki bin dokuz yüz elli riyâlî kuruş müdde‘î-i mezbûra zimmetinde lâzımü’l-edâ deynimdir deyû bi tav‘ihî ikrâr ve i‘tirâf etmeğin, ikrârı mûcebince meblağ-ı müdde‘ân iki bin dokuz yüz elli riyâlî kuruşun müdde‘î-i mezbûr Yako’ya edâya mezbûr Cevâhirci Yako üzerine ilzâm olunup mâ vaka‘a bi’t-taleb ketb olundu. Hurrire fi’l-yevmi’s-sâmin aşer min Saferi’l-hayr li sene tis‘a ve hamsîn ve elf. Şuhûdü’l-hâl: İsa Bey bin Ahmed, Ahmed Çelebi b. Abdülbâkī. Mustafa Çavuş b. Mehmed, Yahya Bey b. Zekeriya ve gayruhüm.