Rumeli Sadareti Mahkemesi 80 Numaralı Sicil (H. 1057-1059/M. 1647-1649) cilt: 15, sayfa: 159 Hüküm no: 161 Orijinal metin no: [38a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kapıcılardan Hasan Bey b. Perviz’in küçük kızı Ümmühâni’nin, eski vasîsi Saliha Hâtun ve Hacı Mehmed b. Hamza’da olan alacaklarının tahsil edildiği Mahmiye-i İstanbul’da Murad Paşa-yı Atîk mahallesinde sâkin iken vefât eden Hasan Bey b. Perviz nâm bevvâb-ı Sultânî’nin sulbiye sagīre kızı Ümmühâni kadının vâlidesi ve tesviye-i umûruna kıbel-i şer‘den mansûbe vasîsi olan Hoşelhân bt. Abdullah nâm hâtun meclis-i şer‘-i hatîr-i lâzımü’t-tevkīrde sagīre-i mezbûrenin sâbıkā vasiyy-i şer‘iyyesi olup ve sagīre-i merkūmenin li ebeveyn kız karındaşı Saliha Hâtun tarafından sagīre-i mezbûreye olan deyni îfâya sâbitetü’l-vekâle vekîli olan işbu râfi‘ül-kitâb el-Hâc Mehmed b. Hamza nâm kimesne mahzarında bi’l-vesâye tav‘an ikrâr ve takrîr-i kelâm edip sagīre-i mezbûrenin babası ve mûrisi müteveffâ-yı mezbûrdan ber-mûceb-i defter-i kassâm-ı askerî sagīre-i mezbûreye isâbet eden yedi yüz yetmiş sekiz kuruşdan gayrı mahmiye-i mezbûrede Horhor sûkunda Başçı Hacı Mahmud Vakfı’ndan olup ba‘de’l-mürâfa‘a icâre-i mu‘accele ve müeccele ile sülüs dükkânın mütefevvez ….? olan Fâtıma Hâtun bt. ( ) ahz eylediği bakkal dükkânının bedel-i ferâğından yetmiş beş riyâlî kuruş ve yine vakf-ı mezbûrda vâki‘ lede’l-ahâlî ma‘lûmü’l-hudûd bir bâb kürkçü dükkânından âhara tefvîz olan sülüs sehimi bedel-i ferâğı olan yüz doksan altı riyâlî kuruş cem‘an bin kırk dokuz riyâlî kuruşu vasiyy-i merkūm el-Hâc Mehmed bi’l-vesâye kabz eyledikden sonra mahalle-i mezbûrede vâki‘ tereke-i müteveffâ-yı mezbûrdan olup lede’l-ahâlî ma‘lûmü’l-hudûd menzilden müteveffâ-yı mezbûrun sulbî oğlu ve vârisi olan Mustafa Çelebi menzil-i mezbûrda olan sehm-i şâyi‘ini âhara bey‘ sadedinde iken mezbûr el-Hâc Mehmed vasîsi olduğu hâlde sagīre-i mezbûreye hayırlı olmağla sehm-i mezbûru dört yüz altmış yedi buçuk riyâlî kuruşa sagīre-i mezbûre için iştirâ ve tesellüm ve semen-i mezbûru meblağ-ı merkūm bin kırk dokuz riyâlî kuruşdan edâ ve teslîm edip ve sagīrenin cihâzı için mezbûr el-Hâc Mehmed yedinde olan meblağ-ı mezbûrdan yüz riyâlî kuruşa bir cevherî kuruş ve altmış altı kuruş ve rub‘ kuruşa bir cevherî İstefan altını sekiz buçuk riyâlî kuruş ve rub‘ kuruşa bir çift altın bilezik ve otuz dört kuruşa on bir miskāl inci iştirâ eyleyip esmân-ı mezbûreyi bâ‘iyyesine edâ edip eşyâ-yı mezbûreyi bana teslîm eyledikde ben dahi kabz edip meblağ-ı mezbûr bin kırk dokuz riyâlî kuruş kaldığından mâ‘adâ a‘lemü’l-ulemâi’l-izâmi’l-kirâm Hocazâde Mesud Efendi zimmetinde olan deynden olup mâ‘adâ(?) otuz altı riyâlî kuruşu <> kabz edip ve meblağ-ı bâkī-i mezbûrun murâbaha-i şer‘iyyesinden dahi on altı riyâlî kuruş ve rub‘ kuruş ahz u kabz etmekle mezbûr el-Hâc Mehmed’in yedinde üç yüz altmış dört kuruş ve rub‘ kalmağın hâlâ vesâyetim hasebiyle meblağ-ı mezbûr üç yüz altmış dört riyâlî kuruş ve rub‘ kuruşu ve sagīre-i mezbûrenin <> merkūm Saliha Hâtun zimmetinde iki yüz kuruşu cem‘an beş yüz yetmiş dört riyâlî kuruş ve rub‘ kuruşu meclis-i şer‘de merkūm el-Hâc Mehmed’in yedinden alıp kabz eyledim. Sagīre-i mezbûre malından vasiyy-i sâbık yedinde ve mezkûr Saliha Hâtun zimmetinde bir akçe ve bir habbe kalmayıp zimmetleri berî <> olmuşdur dedikde gıbbe’t-tasdîk-i şer‘î mâ vaka‘a bi’t-taleb ketb olundu. Fî gurreti şehri Rebî‘ulâhir li sene tis‘a ve hamsîn ve elf. Şuhûdü’l-hâl: Ömer Efendi b. Fazlullah, Mustafa Efendi b. Abdülkerim. Ahmed Çelebi b. Hasan, Yahya Bey b. Zekeriya, Ali Bey b. Ahmed Beşe.