Rumeli Sadareti Mahkemesi 80 Numaralı Sicil (H. 1057-1059/M. 1647-1649) cilt: 15, sayfa: 160 Hüküm no: 162 Orijinal metin no: [38b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kuşbaz Ahmed b. Mehmed’in evini Hacı Abdi Ağa b. Ömer’e sattığı Mahmiye-i İstanbul’da Firuzağa mahallesinde sâkin Kuşbaz Ahmed b. Mehmed meclis-i şer‘-i hatîr-i lâzımü’t-tevkīrde işbu sâhibü’l-kitâb el-Hâc Abdi Ağa b. Ömer mahzarında tav‘an ikrâr ve i‘tirâf edip zikri âtî akdin sudûruna değin yedimde ve taht-ı tasarrufumda münselik mülk ve hakkı olup mahalle-i mezkûrede vâki‘ bir tarafı Mustafa Efendi b. ( ) Vakfı’na ve bir tarafı Emine Hâtun bt. Ahmed mülküne ve bir tarafı tarîk-i hâssa ve bir tarafı ( ) Vakfı’na muttasıl olup iki bâb fevkānî ve iki bâb tahtânî büyûtu ve kenîfi ve havluyu müştemil cemî‘ menzilimi kâffe-i hukūk ve mürâfıkı ile mezbûr el-Hâc Abdi Ağa’ya kırk bin fıddî râyic fi’l-vakt cedîd akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm edip ol dahi nefsiyçün iştirâ ve tesellüm ve kabûl eyledikden sonra semen-i mezbûr kırk bin akçeyi merkūm el-Hâc Abdi Ağa yedinden tamâmen ahz u kabz ve istîfâ eyledim. Min ba‘d cemî‘ menzil-i mezkûr mezbûr Abdi Ağa’nın mülk-i müşterâsı ve hakk-ı sırfıdır. Benim alâka ve hakkım kalmadı dedikde, mukırr-ı mezbûrun ikrâr-ı meşrûhunda el-mukarrun lehü’l-mezbûr el-Hâc Abdi vicâhen tasdîk ve şifâhen tahkīk edicek, mâ hüve’l-vâki‘ bi’t-taleb ketb olundu. Hurrire fi’l-yevmi’s-sâbi‘ aşer min şehri Rebî‘ulâhir li sene tis‘a ve hamsîn ve elf. Şuhûdü’l-hâl: Mehmed b. Hasan Müezzin, Halil b. Ali İmâm, Ali Ağa b. Hüseyin, Halil Çavuş b. İbrahim. Halil b. Mehmed, Şahbaz b. Cafer.