Rumeli Sadareti Mahkemesi 80 Numaralı Sicil (H. 1057-1059/M. 1647-1649) cilt: 15, sayfa: 160 Hüküm no: 163 Orijinal metin no: [38b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mumcu Mehmed Beşe’ye ait olup Beytülmâl Emini tarafından el konulmuş olan terekenin vârislere teslimi Vilâyet-i Anadolu’da vâki‘ medîne-i Kayseri’de el-Hâc Kılıç mahallesinde sâkin işbu sâhibü’l-kitâb Sa‘d[i] b. Ali kendi tarafından asâleten ve karındaşları Zekeriya ve Abdülhalim taraflarından vekâleten meclis-i şer‘-i hatîr-i lâzımü’t-tevkīrde Dergâh-ı âlî yeniçerilerinin Otuz Sekizinci Ağa Bölüğü’nden olup bundan akdem vefât eden Mumcu Mehmed Beşe’nin zâhirde vâris-i ma‘rûfu olmamağla yeniçeri beytülmâl emîni olup tereke-i müteveffâ-yı mezbûra vaz‘-ı yed eylediği mütehakkık olan İlyas Ağa b. Sinan tarafından husûmete vekîl olup vekâleti şer‘an sâbite olan Mehmed Beşe b. Mustafa mahzarında üzerine takrîr-i da‘vâ edip zikr olunan Otuz Sekizinci Ağa Bölüğü’nde vefât eden Mumcu Mehmed Beşe’nin ben ve müvekkillerim mezbûrân Zekeriya ve Abdülhalim li ebeveyn karındaşlar ve bi’l-inhisâr vârisleriyiz. Babamız ismi Ali’dir ve anamız ismi Anyi’dir. Cümlemizin maskat-ı re’sleri Kayseriye’de el-Hâc Kılıç mahallesidir. Müteveffâ-yı mezbûrun cemî‘ terekesine bi’l-verâse ben müvekkillerim mezbûrân müstahıklar iken işbu Mehmed Beşe’nin müvekkili olan İlyas Ağa tereke-i müteveffâ-yı mezbûra nâ-hak vaz‘-ı yed eylemişdir. Suâl olunup tereke-i mezbûreden kasr-ı yed eyleyip bana asâleten ve vekâleten teslîm olunmasın taleb ederim dedikde, gıbbe’s-suâl mezbûr Mehmed Beşe müvekkilinin tereke-i müteveffâ-yı mezbûra vaz‘-ı yed eylediğini ikrâr edip müdde‘î-i mezbûrun ve müvekkilleri mezbûrânın verâsetlerini ve müdde‘î-i merkūmun vekâletini inkâr edicek, müdde‘î-i mezbûrdan da‘vâ-yı meşrûhasını mübeyyin beyyine taleb olundukda udûl-i ahrâr-ı ricâl-i müslimînden olup fi’l-asl mahalle-i mezbûreden evvelâ Salahaddin Efendi b. İsmail el-kadı ve Fazlı Bey b. Ahmed nâm kimesneler li ecli’ş-şehâde meclis-i şer‘a hâzırân olup gıbbe’l-istişhâd, her biri şehâdet edip fi’l-hakīka işbu müdde‘î Sa‘di Dergâh-ı âlî yeniçerilerinden Otuz Sekizinci Ağa Bölüğü’nde vefât eden Mumcu Mehmed Beşe’nin li ebeveyn karındaşı ve işbu Sa‘di Bey müvekkileri Zekeriya ve Abdülhalim dahi li ebeveyn karındaşlarıdır. [Babaları] ismi Ali’dir ve anaları ismi Anyi’dir? Müteveffâ-yı mezbûrun verâseti mezkûrûn Sa‘di ve Zekeriya ve Abdülhalim’e münhasıradır. Mezbûrûndan gayrı vâris-i âharı ve terekesine mezbûrun gayrı müstahak olduğu ma‘lûmumuz, mezbûrdan hisselerini da‘vâ ve kabzına vekîl eylemişdir. Vekâlet-i mezkûreyi kabûlü ile cemî‘ terekeden emîn-i mezkûre kasr-ı yed edip işbu Sa‘di’ye teslîmi vâcibdir. Biz bu husûsa şâhidleriz, şehâdet dahi ederiz deyû her biri edâ-i şehâdet-i şer‘iyye eylediklerinde gıbbe ri‘âyetihî şerâyiti’l-kabûl şehâdetleri makbûl olmağın mûcebince mezkûrûnun üzerine ve vekâlet-i mezbûre ve tereke-i müteveffâ-yı mezbûrdan emîn-i merkūmun kasr-ı yedine ve müdde‘î-i mezkûra teslîmine hükm-i şer‘î olunup mâ hüve’l-vâki‘ bi’t-taleb ketb olundu. Hurrire fi’l-yevmi’s-sâbi‘ aşer min şehri Rebî‘ulâhir li sene seb‘a ve hamsîn ve elf. Şuhûdü’l-hâl: Mustafa Efendi b. el-Hatîb, Mehmed Bey b. Ebûbekir, Yahya Bey b. Zekeriya, İsa Çelebi b. Ahmed.