Rumeli Sadareti Mahkemesi 80 Numaralı Sicil (H. 1057-1059/M. 1647-1649) cilt: 15, sayfa: 163 Hüküm no: 165 Orijinal metin no: [39b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Halil Paşa’nın kölesi Sertabe bt. Abdullah’ın müdebbere suretiyle âzat edildiği Vech-i âtî üzre rikka inkıyâdı mütehakkık olan işbu uzun boylu açık kaşlı kara gözlü Rûsiyyetü’l-asl Müslime’l-mille Sertabe bt. Abdullah Dîvân-ı Hümâyûn’da meclis-i şer‘-i hatîrde Antab A[y]ntab sancağına mutasarrıf iken taraf-ı saltanat-ı aliyyeden katl olunan Halil Paşa’nın zâhirde vâris-i ma‘rûfu olmayıp terekesi beytülmâla âid olmağla mahmiye-i İstanbul’da beytülmâl-ı hâs emîni olup tereke-i müteveffâ-yı mezbûre merkūme Sertabe’ye vaz‘-ı yed eden Mehmed Ağa b. ( ) mahzarında üzerine takrîr-i da‘vâ edip ben müteveffâ-yı mezkûr Halil Paşa’nın câriye-i memlûkesi ve rıkkıyyesi olup müteveffâ-yı mezkûr Halil Paşa vefâtından beş sene mukaddem hâl-i nefâz-ı tasarrufâtında beni tedbîr-i mutlak ile tedbîr edip ben müdebbere olup müteveffâ-yı mezbûrun fevtiyle ve terekesinin sülüsü kıymetime kâfî ve vâfî olmağla hâlâ hürre iken işbu emîn Mehmed Ağa beni istirkâk edip üzerime nâ-hak vaz‘-ı yed eylemişdir. Suâl olunup üzerimden yed-i mubtılasının izâle ve sebîlim tahliye olunmasın taleb ederim dedikde, gıbbe’s-suâl emîn-i mezbûr tedbîr-i mezkûru inkâr edicek, müdde‘iye-i mezkûreden da‘vâ-yı meşrûhasını müsbite beyyine taleb olundukda udûl-i ahrâr-ı ricâl-i müslimînden Ahmed Çavuş b. Mehmed ve Sucu Süleyman Bey b. Hızır nâm kimesneler Dîvân-ı Hümâyûn’da meclis-i şer‘-i hatîrde li ecli’ş-şehâde hâzırân olup gıbbe’l-istişhâd, her biri şehâdet edip fi’l-hakīka Antab sancağına mutasarrıf iken katl olunan Halil Paşa işbu müdde‘iye Sertabe’yi tedbîr-i mutlak ile tedbîr eyledi. Hâlâ mezkûr Halil Paşa fevt olup terekesinin sülüsü işbu Sertabe’nin kıymetine vâfîdir ve bu vechile işbu müdde‘iye hürredir, biz bu husûsa şâhidleriz, edâ-yı şehâdet-i şer‘iyye ederiz deyû her biri münkir-i mezbûr muvâcehesinde edâ-yı şehâdet-i şer‘iyye eylediklerinde gıbbe ri‘âyetihî reşâyiti’l-kabûl şehâdetleri makbûle oldukdan sonra şehâdet-i mezbûre mûcebince mezbûre Sertabe’nin ıtkına ve emîn-i mezbûrun izâle-i yedine hükm-i sahîh-i şer‘î ile hükm olunup mâ vaka‘a bi’t-taleb ketb olundu. Hurrire fi’l-yevmi’s-sânî aşer min şehri Rebî‘ulâhir li sene tis‘a ve hamsîn ve elf. Şuhûdü’l-hâl: Abdülfettâh Ağa b. Mehmed Çavuş-ı Dergâh-ı âlî, Süleyman Ağa b. Pîrî, Mahmud Ağa b. Şehman