Rumeli Sadareti Mahkemesi 80 Numaralı Sicil (H. 1057-1059/M. 1647-1649) cilt: 15, sayfa: 164 Hüküm no: 166 Orijinal metin no: [39b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İbrahim Çelebi b. Hacı Hasan’ın Mustafa Beşe b. Mehmed’de olan alacağının tahsil edilmesi Mahmiye-i İstanbul’da Şeyh Ebü’l-vefa mahallesi sükkânından işbu sâhibü’l-kitâb İsmail Çelebi b. el-Hâ[c] Hasan meclis-i şer‘-i hatîr-i lâzımü’t-tevkīrde mahmiye-i mezbûrede Molla Gürânî’de sâkin Mustafa Beşe b. Mehmed mahzarında üzerine takrîr-i da‘vâ edip mezbûr Mustafa Beşe zimmetinde yedimde müşterâ ve makbûzum kantarı on altışar riyâlî kuruşdan yirmi sekiz kantar peynir bahâsından cem‘an dört yüz kırk kıt‘a riyâlî kuruş hakkım vardır. Suâl olunup alıverilmesin taleb eder dedikde, gıbbe’s-suâl mezkûr Mustafa cevâbında fi’l-hakīka müdde‘iye-i mezbûr İsmail Çelebi’ye vech-i meşrûh üzre her kantarı on altışar riyâlî kuruşa olmak üzre yedinden müşterâ ve makbûz yirmi sekiz kantar bahâsından cem‘an zimmetimde dört yüz kırk sekiz kıt‘a riyâlî kuruş vâcibü’l-edâ ve lâzımü’l-kazâ deynimdir deyû tav‘an ikrâr ve i‘tirâf etmeğin ikrârı mûcebince meblağ-ı mezbûru’n-na‘t dört yüz kırk sekiz kıt‘a riyâlî kuruşu müdde‘î-i mezbûr İsmail Çelebi’ye teslîme merkūm Mustafa Beşe üzerine hükm olunup mâ hüve’l-vâki‘ bi’t-taleb ketb olundu. Fi’l-yevmi’l-hâmis aşer min şehr-i Rebî‘ulâhir li sene tis‘a ve hamsîn ve elf. Şuhûdü’l-hâl: Ahmed Beşe b. İbrahim el-mübâşir, Ramazan Beşe b. Ali er-râcil, Musa Çelebi b. Mehmed, Mustafa Beşe b. Mustafa.