Rumeli Sadareti Mahkemesi 80 Numaralı Sicil (H. 1057-1059/M. 1647-1649) cilt: 15, sayfa: 165 Hüküm no: 167 Orijinal metin no: [40a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Halil Paşa’nın kölesi Gülistan bt. Abdullah’ın müdebbere suretiyle âzat edilmiş olduğu Vech-i âtî üzre rıkka inkıyâdı mütehakkık olan işbu orta boylu açık kaşlı ak benizli Çerkesiyyetü’l-asl müslimetü’l-mille Gülistan bt. Abdullah ve Dîvân-ı Hümâyûn’da meclis-i şer‘-i hatîrde Antab sancağına mutasarrıf iken taraf-ı saltanat-ı aliyyeden katl olunan Halil Paşa b. ( )’ın zâhirde vâris-i ma‘rûfu olmayıp terekesi beytülmâla âid olmağla mahmiye-i İstanbul’da Beytülmâl-ı hâssa emîni olup tereke-i müteveffâ-yı mezbûra ve merkūme Gülistan’a vaz‘-ı yed eden Mehmed Ağa b. ( )’nin üzerine takrîr-i da‘vâ edip ben müteveffâ-yı mezkûr Halil Paşa’nın câriye-i memlûkesi ve rakīkası olup müteveffâ-yı mezbûr Halil Paşa vefâtından beş sene mukaddem hâl-i nefâz-ı tasarrufâtında beni tedbîr-i mutlak ile tedbîr edip ben müdebbere olup müteveffâ-yı mezbûrun fevtiyle ve terekesinin sülüsü kıymeti vâfî ve dâfî olmağla hâlâ hürre iken işbu emîn Mehmed Ağa beni istirkâk edip üzerime nâ-hak vaz‘-ı yed eylemişdir. Suâl olunup üzerimden yed-i mubtılası izâle ve sebîlim tahliye olunmasın taleb eder dedikde, gıbbe’s-suâl emîn-i mezkûr tedbîr-i mezkûru inkâr edicek, müdde‘iye-i mezbûre Gülistan’dan da‘vâ-yı meşrûhasını mübeyyin beyyine taleb olundukda udûli’l-ahrâr-ı ricâl-i müslimînden Ahmed Çavuş b. Mehmed ve Kabûlî Süleyman Bey b. Hızır nâm kimesnelere Dîvân-ı Hümâyûn’da meclis-i şer‘a hâzırân olup gıbbe’l-istişhâd her biri şehâdet edip fi’l-hakīka Antab sancağına mutasarrıf iken katl olunan Halil Paşa b. ( ) vefât etmezden beş sene mukaddem hâl-i nefâz-ı tasarrufâtında <> sülüsü işbu Gülistan’ın kıymetine vâfîdir ve bu cümle işbu müdde‘iye hürredir. Biz bu husûsa şâhidleriz şehâdet dahi ederiz deyû her biri münkir-i mezbûr muvâcehesinde edâ-i şehâdet-i şer‘iyye eylediklerinde gıbbe’t-tasdîk şerâyiti’l-kabûl şehâdeti makbûle oldukdan sonra şehâdet-i mezbûre mûcebince Gülistan’ın ıtkına ve emîn-i mezkûrun izâle-i yedine hükm-i sahîh-i şer‘î ile hükm olunup, mâ hüve’l-vâki‘ bi’t-taleb ketb olundu. Fi’l-yevmi’s-sânî aşer min şehri Rebî‘ulâhir li sene tis‘a ve hamsîn ve elf. Şuhûdü’l-hâl: Umdetü’l-emâcid Abdülfettâh Ağa [b.] Mehmed Serçavuş-ı Dergâh-ı âlî, Süleyman Ağa b. Muhzır Ağa, Mahmud Ağa b. Şehman